Бутун дунё бўйлаб коронавирусга чалинганлар сони 50 миллион кишидан ошди. Бу ҳақда касаллик тарқалишини реал вақтда кузатиб келаётган Жонс Ҳопкинс университети маълумотларида келтирилган.
Ҳозирга қадар дунёда 1,2 миллиондан ортиқ одам COVID-19 қурбонига айланган, 32,8 миллион нафар бемор соғайган.
Касаллар сони бўйича АҚШ дунёда биринчи ўринда кетмоқда — 9,8 миллион. Пандемия бошланганидан буён мамлакатда 237 мингдан ортиқ одам коронавирус оқибатида вафот этган, 3,8 миллион бемор соғайган.
Иккинчи ўринда Ҳиндистон — мамлакатда 8,5 миллион кишида коронавирус тасдиқланган бўлиб, уларнинг 126 минги вафот этган ва 7,8 миллиони соғайган.
Ундан кейинги ўринда Бразилия — коронавирусга чалинганлар сони 5,6 миллиондан ошган, уларнинг 162 минги вафот этган ва 5,1 миллиони соғайган.
Тўртинчи ўринда 1,7 миллиондан ортиқ коронавирусга чалинганлар билан Россия кетмоқда. Мамлакатда 30 минг киши COVID-19 қурбонига айланган бўлса, 1,3 миллион бемор соғайган. Россияда қаторасига 3-кун 20 мингдан ортиқ кишида COVID-19 аниқланган.
Маълумот учун, дунёда коронавирусга чалинганлар сони 5 октябрь куни 35 миллиондан, 11 октябрь куни 37 миллион, 14 октябрь куни 38 миллион, 19 октябрь куни 40 миллион, 22 октябрь куни 41 миллион, 5 ноябрь куни 48 миллион кишидан ошганди.
Изоҳ (0)