Янгийўлда йил давомида 37 марта қоида бузган ва жарималарини тўламаган ҳайдовчининг Spark’и жарима майдонига жойлаштирилди

Тошкент вилоятида ўтказилаётган ҳуқуқбузарликларга қарши курашиш ва хизмат фаолиятини такомиллаштириш ойлигининг 15 куни давомида жами 589 та транспорт воситаси белгиланган жарималарни муддатида тўламагани учун қарздорлик ундирилгунга қадар жарима майдонига жойлаштирилди. Бу ҳақда Тошкент вилояти ИИББ ахборот хизмати хабар қилган.

Жумладан, Янгийўл туманида хизмат олиб бораётган ЙПХ инспектори томонидан Spark автомобили йўл ҳаракати қоидаларини бузганлиги учун тўхтатилиб, электрон маъмурий баённома расмийлаштириш вақтида автоуловнинг махсус автоматлаштирилган фото ва видео қайд этиш воситалари орқали 2020 йил давомида 37 марта қоидабузарлик содир этгани, белгиланган жарималарни ўз вақтида тўламай келгани аниқланган. Spark қарздорлик ундирилгунга қадар вақтинчалик жарима майдонига жойлаштирилган.

Ўзбекистон Республикаси Маъмурий жавобгарлик тўғрисидаги кодекснинг 291-моддасида йўл ҳаракати қоидаларини бузганлик учун жарима солиш ҳақида қарор чиқарилган кундан эътиборан олтмиш кун ичида жарима тўланмаган тақдирда, транспорт воситасига жарима солиш тўғрисида қарор чиқарган ваколатли орган раҳбарининг ёзма кўрсатмасига биноан жарима солиш тўғрисидаги қарорнинг ижроси юзасидан иш юритиш тугагунига қадар ушлаб турилиши белгиланган, дейилади Тошкент вилояти ИИБ хабарида.