Шавкат Мирзиёев соғлиқни сақлаш масалаларига бағишлаб ўтказилаётган йиғилишда журналист ва блогерлар фаолияти хусусидаги фикрларини айтиб ўтди. Бу ҳақда АОКА директорининг биринчи ўринбосари Дилшод Саиджонов ўз Telegram каналида пост қолдирган.
«Мен тизимдаги муаммоларни кўтариб чиқаётган, ёритиб бераётган журналист ва блогерлардан хурсандман. Айнан улар кўплаб муаммо ва қилинаётган ишларни ёритиб бермоқда.
Албатта, бу масалалар оддий тилда айтганда эви, тасдиғи билан бўлиши керак. Улар одатда кўп масалаларни ўзи ўқиган, яъни ривожланган давлатлар билан солиштиришади. Лекин улар шуни ҳам тушунишлари керакки, бизда очиқлик сиёсатига энди 3 йил бўлди. Журналист ва блогерлар солиштираётган давлатларнинг эркинлигига эса 300 йил бўлган.
Биз, албатта, шу даврларга ҳам етамиз. Улар ўзимизга муносиб масалаларни ёритишда қўрқмаслиги керак», – дея таъкидлаган Шавкат Мирзиёев.
Эслатиб ўтамиз, давлат раҳбари раислигида бўлиб ўтган йиғилишда Ўзбекистонда Сирдарё мисолида кафолатланган тиббий хизматлар ва дори воситалар пакетлари ишлаб чиқилиши, оилавий шифокорга ёрдам берадиган «тиббиёт бригадалари» ташкил этилиши, чекка ҳудудлардаги муассасаларга ишга кирган тиббиёт ходимларига 30 миллион сўм миқдорида бир марталик пул маблағи берилиши маълум қилинган. Ўзбекистоннинг ҳар бир вилоятида «тиббиёт кластерлари» ташкил этилиши белгилаб олинган. Шунингдек, соғлиқни сақлаш тизимини ислоҳ қилиш масаласида ўтказилган йиғилишда бирламчи бўғиннинг камида 50 фоиз иши аҳолини тўғри овқатланиш ва жисмоний тарбияга ўргатиш бўлиши лозимлиги таъкидланган.
Изоҳ (0)