Ўзбекистонда ўтган икки йилда 1 минг 986 нафар мансабдор шахс коррупциявий жиноятларни содир этганлиги учун жиноий жавобгарликка тортилган. Бу ҳақда 7 ноябрь куни Бош прокуратурада ташкил этилган коррупция масалаларига оид идоралараро йиғилишда маълум қилинди.
Таъкидланишича, бундай жиноятлар оқибатида етказилган моддий зарар миқдори 2 триллион сўмдан ошган.
«Очиғини айтсак, бугун айрим соҳалар, вазирлик ва идораларда коррупциявий қонун бузилишлар, порахўрлик ва мансаб суиистеъмолликлари газак олмоқда», — дейди Йўлдошев. Бош прокуратура раҳбари бюджет маблағларидан мақсадли ва оқилона фойдаланиш йил сайин долзарб муаммога айланиб бораётганлигини ташвиш билан таъкидлади. Жумладан, энг қуйи поғоналардан бошлаб республика даражасигача бюджет маблағларини талон-торож қилишнинг турли коррупциявий схемалари кенг илдиз отганлигини кўрсатган.
Йиғилишда прокуратуранинг назорат тадбирлари ҳамда тергов натижалари таҳлили асосида коррупция энг кўп учраётган соҳалар, вазирлик ва идоралар кесимида аниқ мисоллар ва рақамларда кўрсатиб берилган. Иқтисодий соҳадаги коррупциявий ҳолатлар асосан бюджет маблағларидан фойдаланиш жараёнида содир этилаётгани билдирилган.
«Сўнгги икки йилда республика бўйича, аҳамият беринг, 371 миллиард сўм бюджет маблағларини талон-торож қилиш ҳолатлари аниқланиб, бу қилмишлар учун 2 минг 477 нафар шахс жиноий жавобгарликка тортилган. Бундай ҳолатлар, асосан, қурилиш, қишлоқ ва сув хўжаликлари, банк, энергетика, таълим ва соғлиқни сақлаш соҳаларига тўғри келади», — дейди Ниғматилла Йўлдошев.
Наманган, Сурхондарё, Жиззах, Қашқадарё, Самарқанд, Андижон, Фарғона, Тошкент вилояти ва Тошкент шаҳрида мазкур жиноий ҳолатларнинг салмоғи юқорилигича сақланиб қолинаётгани билдирилди. Бюджет маблағларининг рационал тақсимланиши ва мақсадли ишлатилиши юзасидан давлат назоратига масъул молия органларининг ўзига юклатилган вазифаларни талаб даражасида бажармаётганлиги ҳам айтиб ўтилган.
Аввалроқ ўтган икки йилда молия органларининг 41 нафар ходими коррупция ҳолатлари учун жиноий жавобгарликка тортилгани тўғрисида хабар берилганди.
Изоҳ (0)