«Грим учун ажратилган маблағга ‘Ўрикзор’дан арзон косметика сотиб олган». Бош прокурор Маданият вазирлигидаги жиноий схема ҳақида

Бош прокуратурада ташкил этилган коррупция масалаларига оид идоралараро йиғилишда Маданият, соғлиқни сақлаш, жисмоний тарбия ва спорт, халқ таълими, ахборот технологиялари ва коммуникацияларини ривожлантириш вазирликлари ҳамда Экология ва атроф-муҳитни муҳофаза қилиш қўмитаси тизими ҳам коррупциядан холи эмаслиги кўрсатиб ўтилди. Бу ҳақда «Дарё» мухбири хабар берди.

Сўнгги 2 йилда Ахборот технологиялари ва коммуникацияларини ривожлантириш вазирлиги тизимидаги 14 нафар, Экология ва атроф-муҳитни муҳофаза қилиш қўмитаси тизимидаги 22 нафар, Жисмоний тарбия ва спорт вазирлиги тизимидаги 35, Маданият вазирлиги тизимидаги 37 нафар ходимлар турли жиноятларга қўл уришган.

Маълум қилинишича, Маданият вазирлигининг айрим мансабдорлари ўзига хос жиноий схема яратган. Муқаддам ўғирлик ва талон-торожлик жиноятлари учун 7 йил озодликдан маҳрум этиш жазосини ўтаб чиққан Ибрагимов 2019 йил февраль ойида вазирлик бош ҳисобчиси лавозимига тайинланган. У дастлаб ишни танишлари Ёрбозоров ва Қўшоқов билан жиноий режа тузишдан бошлаган.

У ўзининг жиноий режаларига кўра, вазирлик харидларини фуқаро Қўшоқов ва унинг яқинларига тегишли фирмаларга бериш учун улардан 26 минг доллар улуш олган.

Шундан сўнг вазирлик тизимидаги театр, маданият уйлари ва бошқа ташкилотларга зарур грим маҳсулотлари учун таниши Қўшоқовга тегишли фирмаларга 2,6 миллиард сўм ўтказиб берилган.

Ўз навбатида, бу фирмалар грим ўрнига «Ўрикзор» бозоридан 264 миллион сўмга арзон ва сифатсиз косметика маҳсулотларини сотиб олиб, уни грим эканлиги ҳақида сохта ҳужжатларни тузиб, вазирликка топширган. Вазирлик эса маданият муассасаларига умуман керак бўлмаган бу маҳсулотларни грим сифатида сохта ҳужжат қилиб, уларга етказиб беради.

«Схемага кўра, маҳсулот нархи ҳужжатларда бир неча баробар қиммат кўрсатилиб, 2,3 миллиард сўм маблағ талон-торож қилинган», — дейди бош прокурор. 1 дона 20 минг сўмлик аёллар пудраси қиймати ҳужжатларда ҳақиқий баҳосидан 57 баравар кўп, яъни 1 миллион 180 минг сўм қилиб кўрсатилган.

Шунингдек, вазирлик ишлар бошқармаси бошлиғи Очилов эса театр ва мусиқий мактабларга аслида етказиб берилмаган мебель ва мусиқа анжомлари етказиб берилгани ҳақида сохта ҳужжатлар тузиб, 1,7 миллиард сўмни ўзига таниш фирмаларга ўтказиб, талон-тарож қилган.

Бундан ташқари, 13,5 миллиард сўмлик мебель ва жиҳозларни танишларидан 20,2 миллиард сўмга олиш йўли билан 6,7 миллиард сўм ҳам талон-торож қилинган. Бу жиноий схема билан 12 миллиард сўм бюджет маблағи ўмарилган. Бу ҳали терговда аниқланган дастлабки фактлар, ҳозирда ушбу шахслар қамоққа олинган бўлиб, тергов ҳаракатлари ўтказилмоқда. Бунга алоқадор барча шахслар, иштирокчилар қайси лавозимда ишлашидан қатъий назар жиноий жавобгарликка тортилади.