Shavkat Mirziyoyev sog‘liqni saqlash masalalariga bag‘ishlab o‘tkazilayotgan yig‘ilishda jurnalist va blogerlar faoliyati xususidagi fikrlarini aytib o‘tdi. Bu haqda AOKA direktorining birinchi o‘rinbosari Dilshod Saidjonov o‘z Telegram kanalida post qoldirgan.
“Men tizimdagi muammolarni ko‘tarib chiqayotgan, yoritib berayotgan jurnalist va blogerlardan xursandman. Aynan ular ko‘plab muammo va qilinayotgan ishlarni yoritib bermoqda.
Albatta, bu masalalar oddiy tilda aytganda evi, tasdig‘i bilan bo‘lishi kerak. Ular odatda ko‘p masalalarni o‘zi o‘qigan, ya’ni rivojlangan davlatlar bilan solishtirishadi. Lekin ular shuni ham tushunishlari kerakki, bizda ochiqlik siyosatiga endi 3 yil bo‘ldi. Jurnalist va blogerlar solishtirayotgan davlatlarning erkinligiga esa 300 yil bo‘lgan.
Biz, albatta, shu davrlarga ham yetamiz. Ular o‘zimizga munosib masalalarni yoritishda qo‘rqmasligi kerak”, – deya ta’kidlagan Shavkat Mirziyoyev.
Eslatib o‘tamiz, davlat rahbari raisligida bo‘lib o‘tgan yig‘ilishda O‘zbekistonda Sirdaryo misolida kafolatlangan tibbiy xizmatlar va dori vositalar paketlari ishlab chiqilishi, oilaviy shifokorga yordam beradigan “tibbiyot brigadalari” tashkil etilishi, chekka hududlardagi muassasalarga ishga kirgan tibbiyot xodimlariga 30 million so‘m miqdorida bir martalik pul mablag‘i berilishi ma’lum qilingan. O‘zbekistonning har bir viloyatida “tibbiyot klasterlari” tashkil etilishi belgilab olingan. Shuningdek, sog‘liqni saqlash tizimini isloh qilish masalasida o‘tkazilgan yig‘ilishda birlamchi bo‘g‘inning kamida 50 foiz ishi aholini to‘g‘ri ovqatlanish va jismoniy tarbiyaga o‘rgatish bo‘lishi lozimligi ta’kidlangan.
Izoh (0)