7 ноябрь куни Бош прокуратурада ташкил этилган коррупция масалаларига оид идоралараро йиғилишда бош прокурор Ниғматилла Йўлдошев «Янгиобод ихтисослашган бозори» директори қатор коррупциявий жиноятларни содир этишда айбланганини маълум қилди.
Таъкидланишича, айни пайтда бозорларда таниш-билишчилик, турли суиистеъмолчилик ва талон-торожликлар авж олмоқда. «Таъбир жоиз бўлса, бу файзли масканлар коррупция ўчоғига айланиб бормоқда»,—дейди Йўлдошев. Хусусан, пойтахтдаги «Янгиобод ихтисослашган бозори» директори Исмоилов қатор коррупциявий жиноятларни содир этишда айбланиб, унга нисбатан тергов ўтказилмоқда.
У муқаддам савдо ва бозор соҳаларида ишлаб, бир неча маротаба судланган, сўнгги бор «Сергели деҳқон бозори» директори лавозимида ишлаганда содир этган суиистеъмолчиликлари ва талон-торожликлар учун 2016 йилда суд ҳукми билан жазоланган. Исмоилов 2019 йил февраль ойида яна «Сергели деҳқон бозори» директори лавозимига тайинланиб, ўша йилнинг апрель ойидан эса «Янгиобод ихтисослашган бозори» директорлигига ўтган.
«Бу бозорда ҳам эски қилиғини давом эттирган Исмоилов, бозорга шахсий мулки сифатида қараб назоратчилар ва тадбиркорларга ўлпонлар солган. Тушумларни чўнтакка уриш, бозор мулкини талон-торож қилиш билан шуғулланиб келган, — дейди Ниғматилла Йўлдошев.
Исмоилов атрофига ўзига хайрихоҳ шахсларни тўплаган. Жумладан, аввал «Сергели деҳқон бозори»да бирга ишлаган Йўлбарсовни ўзига ўринбосар, Тимофеевни бош ҳисобчи, куёви Жаҳоновни хавфсизлик бўлими раҳбари этиб тайинлаган. Қисқа муддатда Исмоилов 2,7 миллиард сўмлик тушум пулларини ўмарганлиги, 919 миллион сўм солиқдан бўйин товлаганлиги, бозорда 124 та ноқонуний қурилмалар қурдирганлиги аниқланган. Терговда ушбу рақамлар кун сайин ортиб бораётгани айтилди.
Талон-торож қилган пуллардан қарийб 740 миллион сўмини Исмоилов легаллаштирган, жумладан, 340 миллион сўмга онаси Асқарова номига Сергели туманидан 5 хонали квартира, хотини Низомова номига 200 миллион сўмга Trailblazer автомашинасини сотиб олган. Бу ҳали аниқланган ҳолатларгина эканлиги қайд этилди.
«Бундай талон-торожлик оқибатида бозор ўта аянчли ҳолатга келиб қолган», — деди бош прокурор.
Хусусан, бугунги кунда ходимларнинг иш ҳақидан 95 миллион сўм, солиқдан 920 миллион сўм, коммунал тўловлардан 978 миллион сўм, бошқа ташкилотлар олдида 240 миллион сўм, жами 2,2 миллиард сўм асосий ҳамда 2,9 миллиард сўм пеня тўловларидан қарздорлик вужудга келган.Бозорда инфратузилма, тартиб-интизом, тозалик, ёнғин хавфсизлиги масалалари абгор аҳволда. Бош прокурор бундай аянчли ҳолат бозор раҳбарияти ва бошқа мутасаддиларни ташвишга солмаганини билдириб ўтди.
«Бу ҳам етмаганидек, кўрган билан кўз тўймас, тек туришга нафс қўймас, деганларидек, Исмоилов бошқа бозорларга ҳам кўз олайтирган. Аҳамият беринг, айрим раҳнамоларининг кўмагида «Сергели деҳқон бозори»га ўғли Бекжон Исмоиловни директор, «Фарҳод деҳқон бозори»га яна бир ўғли Жаҳонгир Исмоиловни директорнинг биринчи ўринбосари, «Авиасозлар деҳқон бозори»га муқаддам ўзи билан бирга судланган Шавкат Қувоновнинг директор этиб тайинланишига ҳам эришган. Бир сўз билан айтганда, ушбу бозорларга ҳам расмий раҳбарлик қилиб келган», — деди Ниғматилла Йўлдошев.
Бош прокурор ҳолатни изоҳлар экан: «Наҳотки бу ҳолатдан Тошкент шаҳар ҳокимлиги ва Муниципиал активларни бошқариш маркази раҳбари Музаффар Абдураҳмоновнинг хабари бўлмаса, ёки қайта қайта судланган, борган жойидан ўзига пул ўмаришни касб қилган бу шахсни яна раҳбарликка тайинлашдан у манфаатдорми? Исмоилов қамоққа олингандан сўнг унинг ўрнига ҳамтовоғи Йўлбарсов тайинланганлигига нима дейсиз?», — деб қўшимча қилган. Йўлдошев тергов давомида ушбу саволларнинг барчасига жавоб топилишини айтган.
Аввалроқ «Арк булоқ» божхона пости собиқ бошлиғи олган пораларини Бўстонлиқдан дала ҳовли, Tashkent City’дан 2 та уй, битта нотурар жой ва Captiva харид қилишга сарфлагани маълум бўлганди.
Мавзуга доир:
Изоҳ (0)