Жо Байден биринчи марта Пенсильвания штатида овозлар сони бўйича Трампдан ошиб кетди. Байден президент бўлиши учун фақат шу штатда ғолиб чиқиши етарли

АҚШ президентлигига демократлардан номзод бўлган Жо Байден биринчи марта Пенсильвания штатида овозлар ҳисобланиши давомида олдинга чиқиб олди. Бу ҳақда Meduza хабар берди.

Штатдаги сайловчилар берган овозларнинг 95 фоизи ҳисоблаб бўлинган вақтда Байден 49,4 фоиз, амалдаги президент Дональд Трамп эса 49,3 фоиз овозга эга бўлган. Икки рақобатчи ўртасидаги фарқ эса тахминан етти мингта овозни ташкил қилмоқда. Пенсильванияда жами 9 миллиондан ортиқ сайловчи рўйхатдан ўтган.

Пенсильвания овозлар тўлиқ ҳисоблаб чиқилмаган олтита штат ичида энг йириги ҳисобланади. Пенсильваниядаги ғалаба номзодга жамоавий сайловчиларнинг 20 та овозини олиб келади.

Ҳозирги пайтда Байдендан жамоавий сайловчиларнинг 253 та, Трампда эса 214 та овози бор. Якуний ғалаба учун 270 та овоз тўплаш керак. Шу тариқа, агар Байден Пенсильванияда ғалаба қозонса, бошқа штатлардаги натижалардан қатъи назар, у АҚШ президенти бўлади. Байден Невада ва Аризона штатларида овозлар ҳисоб-китобининг бошидан буён етакчилик қилмоқда, Жоржия штатида эса у 6 ноябрь куни эрталаб Трампни ортда қолдирди.

Трампнинг штаби эса Байденни ғолиб деб аташга ҳали эрта эканлигини таъкидламоқда. «Бу сайлов ҳали тугамади. Жо Байденнинг ғалабаси ҳақидаги ёлғон тахмин ҳали якуний бўлмаган натижаларга асосланган», — дея маълум қилган амалдаги президентнинг штаби вакили Мэтт Морган. Унинг таъкидлашича, Трампнинг вакиллари талаб қилаётган овозларни қайта ҳисоблашда вазият ўзгариши мумкин.

Ўз навбатида, Байденнинг штаби маълум қилишича, у қисқа вақт — ёки кун давомида, ёки 6 ноябрь куни кечқурун миллатга мурожаат билан чиқишга тайёр бўлади.