AQSh prezidentligiga Demokratik partiyadan nomzod Jo Bayden amerikaliklarga qilgan murojaatida saylovlarda raqibi, amaldagi prezident Donald Tramp ustidan yetarli darajadagi ustunlik bilan g‘alaba qozonishiga ishonishini bildirdi. Bu haqda “Interfaks” xabar bergan.
Bayden garchi hisob-kitoblarga ko‘ra unga berilgan ovozlar soni bo‘yicha ustunlik qilayotgan bo‘lsa ham, hali saylovlarda o‘zini g‘olib deb e’lon qilgani yo‘q.
“Biz garchi raqamlar shuni ko‘rsatib turgan bo‘lsa ham g‘alaba haqida uzil-kesil e’lon qilishga shoshilmaymiz”, – degan Bayden Delaver shtatidagi Uilmington universitetida qilgan chiqishida.
AQSh sobiq vitse-prezidenti bir sutka avval Trampdan Jorjiya va Pensilvaniya kabi asosiy shtatlarda ortda qolgani, keyinchalik undan o‘zib ketganini eslatgan. Arizona hamda Nevadada ham shunday holatlar kuzatilgan.
“Biz saylovchilarning yana 300 dan ortiq ovozini to‘plab, poygada g‘olib chiqmoqchimiz. Bahsda yaqqol ustunlik bilan g‘alaba qozonishimiz zarur, ortimizda mamlakat turibdi”, – degan Bayden.
Shuningdek u ovozlarning hisob-kitob qilinishi to‘xtatilishiga yo‘l qo‘ymasligini aytgan.
“Menga kimning hisob-kitobni to‘xtatishga urinayotganining farqi yo‘q. Buning sodir bo‘lishiga yo‘l qo‘ymayman”, – degan demokratlar nomzodi.
AQSh vitse-prezidentligiga nomzod Kamala Xarris ham Bayden nutq so‘zlagan vaqtda uning yonida turgan, biroq u minbarda gapirmagan.
AQSh prezidentligi uchun saylovlar 3-noyabrda bo‘lib o‘tgan, lekin ovozlarning hisob-kitobi bo‘yicha yakuniy natijalar hanuzgacha e’lon qilinmayapti. Chunki bu safargi saylovlarda pandemiya sabab byulletenlar pochta orqali saylovchilarga yuborilgan edi.
Fox News telekanalining prognozi bo‘yicha Bayden allaqachon 270 ta ovoz kerak bo‘lgan vaziyatda 264 ta ovoz olishga ulgurgan, Tramp esa 214 ta ovoz olmoqda. Pensilvaniya, Jorjiya va Nevadada hali Bayden g‘olib deya e’lon qilinmagan, biroq uning ustunligi borgan sari oshib bormoqda.
6-noyabrda saylov komissiyasiga kelib tushgan byulletenlar hisob-kitobida demokratlar nomzodi avval Tramp ustunlikka ega bo‘lgan bir qator asosiy shtatlarda yetakchilikka chiqqan. Amaldagi prezident va uning tarafdorlari ovozlarning qalbakilashtirilgani haqida gapirmoqda va g‘alabani sud orqali qo‘lga kiritishni ko‘zlagan. Yevropada xavfsizlik va hamkorlik tashkiloti Amerika prezidenti saylovlari chog‘ida qoidabuzarliklar aniqlanmaganini ma’lum qilgan.
Izoh (0)