Новосибирсклик реставратор Борис Беспалчий 1965 йилда ишлаб чиқарилган учинчи серияга оид «ГАЗ-21» автомобилини икки йил давомида қайта тиклади, деб хабар беради Motor.
Қайта тиклаш жараёнида Беспалчий «Волга»га бироз ўзгартириш киритишга қарор қилиб, моделнинг аввалги нусхаларида тегишли эҳтиёт қисмларни қидириб кўрган. Натижада автомобиль юлдузчага эга хромланган радиатор панжарасига эга бўлган, капотидан эса худди «ГАЗ-21»нинг биринчи сериясидаги каби буғу фигураси пайдо бўлган. «Волга» учинчи сериядан бошлаб капот устидаги безакдан воз кечган — у пиёдалар учун хавфсиз эмас деб топилган.
Реставраторнинг сўзларига кўра, ноёб «Волга»ни қайта тиклаш осон кечмаган: 55 ёшли автомобилнинг кузови занглаб кетган. Шунингдек, машинанинг юқори қисмига ишлатилган хромли безаклар вақт ўтиши билан шикастлангани қўшимча мураккабликни юзага келтирган.
Ачинарли аҳволда бўлган салон ҳам тўлиқ қайта тикланган: диванлар қайта тикилган ва сунъий чарм билан қопланган. Ёрилган пластик элементларни янгисига алмаштиришга тўғри келган. Эътиборли жиҳати, руль чамбараги оригинал чизмалар асосида «Волга» учун махсус ясалган.
75 от кучига эга завод моторининг барча поршенлари алмаштирилган ва клапан механизмлари таъмирланган, алюминийли янги цилиндрлар блоки ўрнатилган. Беспалчий автомобилни тўлиқ қайта таъмирлаш учун салкам икки йил вақтини сарфлаган.
Мавзуга доир: КГБ ходимларига тегишли Toyota V6 двигатели ўрнатилган идеал ҳолатдаги «Волга» сотувга қўйилди
Мавзуга доир: Санкт-Петербургда Mercedes-Benz базасида яратилган «Волга» 210 минг доллар эвазига сотувга қўйилди (фото)
Изоҳ (0)