Европа иттифоқи мамлакатларининг доимий вакиллари Брюсселда Беларуснинг юқори мартабали амалдорларига қарши санкциялар қўллашни келишиб олди. Бу ҳақда «ТАСС» хабар берган.
Дипломатлардан бирининг айтишича, янги қора рўйхатга Беларусь президенти Александр Лукашенко ҳам киритилган. Расмий қарор Евроиттифоқ кенгаши томонидан яқин кунларда чиқарилади.
«Радио Свобода» журналисти Рикард Ёзвяк Лукашенкодан ташқари, яна 14 нафар кишининг санкциялар рўйхатига кирганини қайд этган. Уларнинг Европадаги активлари музлатиб қўйилади ва Евроиттифоқ ҳудудига чиқиши тақиқланади.
Октябрь бошида Евроиттифоқ президентлик сайловларидаги натижаларни қалбакилаштиргани ва норозилик намойиши ўтказаётган фуқароларга куч ишлатгани учун 40 нафар Беларусь амалдорларига нисбатан санкциялар жорий қилганди. Ўшанда Лукашенко рўйхатга киритилмаган, Брюссель ушбу қарорни Минск билан музокараларнинг тикланишига умид беришини маълум қилганди.
Октябрь ўрталарида Евроиттифоқ Беларусдаги вазият ўзгармаса, Лукашенкога нисбатан санкциялар қўлланишини билдирган.
Изоҳ (0)