Дания ҳукумати раҳбари Мэттэ Фредериксен ҳамда вазирлар маҳкамасининг 13 нафар аъзоси масофадан туриб ишлаш тартибига ўтмоқда ва Адлия вазирида коронавирус тасдиқлангани туфайли COVID-19 бор ёки йўқлигини аниқлаш учун тест топширади. Бу ҳақда Eurointegration хабар берган.
Дания адлия вазири Ник Хеккеруп 3 ноябрь куни коронавирусга топширган тестининг натижаси мусбат бўлиб чиққани ва касаллик аломатлари ўзида кузатилаётганини маълум қилганди.
У охирги марта ҳукуматдаги ҳамкасблари билан ўтган ҳафтада шахсан учрашган. Дания бош вазири матбуот хизмати учрашувда ҳукуматнинг ҳамма аъзолари карантин меъёрларига қатъий амал қилганини билдирган.
Адлия вазирининг баёнотидан кейин Консерваторлар мухолифат партияси етакчиси Сорен Папе ҳам ўзи коронавирусга топширган тестнинг натижаси ижобий эканини айтган.
Данияда 3 ноябрда касалланишлар сони бўйича янги антирекорд ўрнатилган – 1353 та ҳолат кузатилган. Мамлакат аҳолисининг умумий сони 5,8 миллионни ташкил қилади.
Данияда октябрь охирида эпидемиологик вазият ёмонлашгани сабаб тиббий ниқобда юриш режими жорий этилган ва 10 нафардан кўп одамларнинг кўчаларда, жамоат жойларида тўпланиши тақиқлаб қўйилган.
Бир неча кун аввал ЖССТ раҳбари COVID-19’га чалинган бемор билан мулоқотда бўлгани туфайли ўз-ўзини яккалаш тартибига ўтганди.
Изоҳ (0)