Бутун дунёда коронавирусга чалинганлар сони 48 миллион кишидан ошди, деб хабар бермоқда «РБК», реал вақт режимида COVID-19 бўйича статистика йиғувчи Жонс Ҳопкинс университети маълумотларига таяниб.
Тошкент вақти билан 5 ноябрь 8:50 ҳолатига кўра, касалланганлар сони 48 008 175 кишини ташкил қилмоқда. Коронавирусни юқтириш бўйича энг кўп ҳолат АҚШда қайд этилган — 4,980 миллионта. Иккинчи ўринда 8,313 миллион бемор билан Ҳиндистон, учинчи ўринда — 5,590 миллион касалланганлар билан Бразилия турибди. Юқори бешликка Россия (1,680 миллион) ва Франция (1,591 миллион) ҳам кирди.
Жаҳон соғлиқни сақлаш ташкилоти 4 ноябрь куни кечки пайт тақдим этган маълумотларга кўра, COVID-19 билан касалланганлар 47,362 миллион кишига тенг бўлса, Worldometer сервиси ҳисоб-китоблари 48,42 миллион беморни кўрсатмоқда.
Университет маълумотлари бўйича бутун дунёда 1,224 миллион киши COVID-19’дан вафот этган. Энг кўп қурбонлар АҚШда (233,6 минг), Бразилияда (161,1 минг), Ҳиндистонда (123,6 минг) ва Мексикада (93,2 минг) қайд этилган.
Аввалроқ дунёда коронавирусга чалиниш ҳолатлари бўйича ҳафталик антирекорд қайд этилгани хабар берилганди. Ўтган бир ҳафта ичида бутун дунё бўйлаб яна 3,3 миллиондан ортиқ одамда коронавирус инфекцияси аниқланган. Таъкидланишича, бу пандемия бошланганидан буён қайд этилган энг юқори кўрсаткич ҳисобланади.
ЖССТнинг Россиядаги вакили Мелита Вуйнович эса яқин бир неча ойда дунёда COVID-19 коронавирус тарқалиши билан боғлиқ вазият жуда оғирлашиши ҳақида огоҳлантирди.
Бир қатор Европа мамлакатлари, хусусан, Нидерландия, Франция, Швейцария ва Грузияда карантин чоралари кучайтирилди.
Изоҳ (0)