АҚШнинг амалдаги президенти Дональд Трамп мамлакат раҳбарини сайлашда муҳим аҳамиятга эга тўртта штатда ғалаба қозонганини маълум қилди. Бу ҳақда у ўзининг Twitter’даги саҳифасига ёзиб қолдирган.
«Сайловчиларнинг овозлари учун қонуний кузатувчиларга рухсат берилмаётган Пенсильванияда ғалабага эришганимизни эълон қилдик. Жоржия ва Шимолий Каролинада Трамп етакчилик қилмоқда. Бундан ташқари, Мичиганда катта миқдорда бюллетенлар яширин равишда ташлангани тасдиқланса, у ердаги ғалабамизни ҳам эълон қиламиз», — деб ёзади Трамп.
Шу билан бирга, дастлабки ҳисоб-китоблар Мичиганда демократ Жо Байденнинг ғалабасини кўрсатмоқда, у 49,9 фоиз овоз тўплаган. Амалдаги президент эса рақибидан 1,3 фоизга орқада.
Висконсиндаги 95 фоиз овознинг ҳисоб-китоби бўйича ҳам Байден етакчи — унда 49,6 фоиз овоз. Трампда эса 48,9 фоиз, унинг жамоаси ушбу штатдаги сайлов натижаларини қайта кўриб чиқиш ниятида — АҚШ қонунлари бўйича номзодлар ўрасидаги фарқ 1 фоиздан кам бўлса, бунинг имкони бор.
Ҳозирча Шимолий Каролина, Жоржия, Невада, Пенсильвания ва Аляскадаги овозлар расман ҳисобланмаган. Сайлов натижаларига фақат дастлабки тўртта штат таъсир кўрсатади (Аляска учта сайловчи билан қатнашмоқда). Fox News телеканали маълумотларига кўра, Трамп Шимолий Каролина, Пенсильвания ва Жоржияда етакчилик қилмоқда. Невада эса ҳозирча Байден фойдасига овоз бермоқда. Дастлабки прогнозлар бўйича, демократ ҳозирда 264 овоз тўплаган. Агарда олтита сайловчи вакилига эга Невадада Байден ғалаба қозонса, АҚШнинг кейинги президентига айнан у айланади.
Эслатиб ўтамиз, аввалроқ АҚШ президенти Дональд Трамп Оқ уйда сайловларда берилган овозларни ҳисоблаш фонида ўз тарафдорлари олдида чиқиш қилиб, ғалаба қозонганини эълон қилганди.
Изоҳ (0)