2016 йилдан буён Тошкент тиббиёт академияси ректори вазифасида ишлаб келган Тўйчиев Лазиз Нодирович Ўзбекистон Республикаси Президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчисининг биринчи ўринбосари вазифасига тайинланди. Бу ҳақда Соғлиқни сақлаш вазирлиги ахборот хизмати хабар берган.
«Тиббиёт фанлари доктори, профессор Лазиз Тўйчиев бундан аввал Эпидемиология, микробиология ва юқумли касалликлар илмий-текшириш институти директори ва Ўзбекистон Республикаси соғлиқни сақлаш вазири ўринбосари каби масъул лавозимларда меҳнат қилган», – дейилади вазирлик хабарида.
Тўйчиев 2020 йилда «Фидокорона хизматлари учун» ордени билан мукофотланган.
Эслатиб ўтамиз, Олий Мажлис Қонунчилик палатаси депутатлари 3 ноябрь куни Ўзбекистон соғлиқни сақлаш вазири лавозимига 2020 йил 15 июль кунидан бери соғлиқни сақлаш вазири биринчи ўринбосари сифатида ишлаётган Абдуҳаким Мўминович Хожибоев номзодини маъқуллаган. Кейинчалик 2017 йилнинг февраль ойидан буён соғлиқни сақлаш вазири сифатида фаолият олиб бораётган Алишер Шодмонов Тошкент тиббиёт академияси ректори этиб тайинлангани хабар қилинганди.
Орадан бир неча соат ўтгач, Ўзбекистон Президентининг фармони билан Абдуҳаким Хожибоев соғлиқни сақлаш вазири этиб, Ўзбекистон Президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси ўринбосари вазифасида ишлаб келган Иноятов Амрилло Шодиевич соғлиқни сақлаш вазирининг биринчи ўринбосари этиб тайинланди.
Изоҳ (0)