Тошкент шаҳар Миробод туманида ота ўзининг собиқ турмушидан бўлган фарзанди учун тўланиши керак бўлган алимент пулини олдиндан бир вақтнинг ўзида тўлади, дея хабар бермоқда Мажбурий ижро бюросига таяниб «Xabar.uz».
Қайд этилишича, фуқаролик ишлари бўйича Миробод туманлараро судининг А.В.дан В.К. (аёл) фойдасида бир нафар вояга етмаган фарзанди учун алимент, гўдак уч ёшга тўлгунча моддий таъминот ундириш ҳақидаги суд ҳужжати ижро этилди.
Мажбурий ижро бюросининг Яшнобод туман бўлими давлат ижроси Ш. Шарафутдинов фуқаро А.В. ҳаммаси (моддий таъминот ва алимент) бўлиб 429 миллион 387 минг 500 сўм алимент пули тўлаши кераклигини маълум қилган. Фуқаро А.В. пул миқдорининг ҳаммасини олдиндан бир вақтнинг ўзида тўлашини маълум қилган.
Шу сабабли ушбу ижро ҳужжати амалда тугатилган.
Аввалроқ Қашқадарёлик ота 260 миллион сўмлик алимент пулини олдиндан тўлагани, бухоролик эркак икки хотинига бирданига 810 миллион сўмдан ортиқ алиментни олдиндан тўлаб бергани ва Қашқадарёда 4 нафар фарзанди учун алимент тўловчи ота Damas’ини собиқ хотинининг номига расмийлаштириб бергани ҳақида хабар берилганди.
Изоҳ (0)