Абдуҳаким Хожибоев Ўзбекистон соғлиқни сақлаш вазири этиб тайинланди. Амрилло Иноятов унинг биринчи ўринбосари бўлди

Ўзбекистон Президентининг фармони билан Абдуҳаким Хожибоев соғлиқни сақлаш вазири этиб тайинланди. Бу ҳақда Соғлиқни сақлаш вазирлиги маълум қилди.

Эслатиб ўтамиз, Олий Мажлис Қонунчилик палатаси депутатлари 3 ноябрь куни Абдуҳаким Мўминович Хожибоев номзодини Ўзбекистон соғлиқни сақлаш вазири лавозимига маъқуллаганди. Абдуҳаким Хожибоев 2020 йил 15 июль кунидан бери соғлиқни сақлаш вазири биринчи ўринбосари сифатида ишлаётган эди.

Вазирлик хабарига кўра, тиббиёт фанлари доктори, профессор Абдуҳаким Хожибоев ўз фаолиятини оддий жарроҳликдан бошлаб, сўнгги 20 йил давомида Республика шошилинч тиббий ёрдам илмий маркази бош директори, Шошилинч тиббий ёрдам врачлар ассоциацияси раиси, соғлиқни сақлаш вазири ўринбосари ва уч бор соғлиқни сақлаш вазирининг биринчи ўринбосари лавозимида ишлаган.

Абдуҳаким Хожибоев 2003 йилда «Ўзбекистон Республикасида хизмат кўрсатган соғлиқни сақлаш ходими» унвони ҳамда 2020 йилда «Эл-юрт ҳурмати» ордени билан мукофотланган.

Шунингдек, Президент фармони билан соғлиқни сақлаш вазирига биринчи ўринбосар ҳам тайинланди. Ўзбекистон Президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси ўринбосари вазифасида ишлаб келган Иноятов Амрилло Шодиевич соғлиқни сақлаш вазирининг биринчи ўринбосари этиб тайинланди.

Тиббиёт фанлари доктори, доцент Амрилло Иноятов бундан аввал Бухоро давлат тиббиёт институти ректори лавозимида ишлаган.

Эслатиб ўтамиз, Ўзбекистон ҳукуматнинг 3 ноябрдаги қарори билан шу пайтгача соғлиқни сақлаш вазири лавозимида ишлаб келган Алишер Шодмонов Тошкент тиббиёт академияси ректори этиб тайинланди.