Ўзбекистон ҳукуматнинг 3 ноябрдаги қарори билан шу пайтгача соғлиқни сақлаш вазири лавозимида ишлаб келган Алишер Шодманов Тошкент тиббиёт академияси ректори этиб тайинланди. Шу муносабат билан собиқ ректор Лазиз Тўйчиев мазкур лавозимдан озод қилинди. Бу ҳақда ЎзА хабар берди.
Алишер Шодмонов 2017 йилнинг февраль ойидан буён соғлиқни сақлаш вазири сифатида фаолият олиб бораётганди. У соғлиқни сақлаш вазири бўлгунига қадар Андижон давлат тиббиёт институти проректори, ректори лавозимларида ишлаган.
Собиқ вазир 2020 йилнинг июлида Республика ихтисослаштирилган кардиология илмий-амалий тиббиёт марказига даволанишга ётқизилганди. Унинг ўрнига бош вазир ўринбосари Беҳзод Мусаев вазирликка раҳбарлик қилганди. Август ойида Алишер Шодмонов ишга қайтган. У ўтган ҳафтада Туркияга сафар қилган вазирлик делегациясига раҳбарлик қилди.
Эслатиб ўтамиз, Олий Мажлис Қонунчилик палатаси депутатлари 3 ноябрь куни Ўзбекистон соғлиқни сақлаш вазири лавозимига Абдуҳаким Мўминович Хожибоев номзодини маъқуллади. У 2020 йил 15 июль кунидан бери соғлиқни сақлаш вазири биринчи ўринбосари сифатида ишлаётган эди.
Изоҳ (0)