Гапириш ва эшитиш билан боғлиқ имконияти чекланган шахслар Тошкент шаҳридаги Давлат хизматлари марказларига мурожаат қилганда сурдотаржимонсиз исталган давлат хизматларидан фойдаланишлари мумкин. Бу ҳақда 3 ноябрь куни Давлат хизматлари агентлиги Тошкент шаҳар бошқармаси томонидан ташкил этилган тадбирда маълум қилинди, дея хабар бермоқда «Дарё» мухбири Мусулмонбек Иброҳимов.
Анжуманда таъкидланишича, Тошкент шаҳридаги 11 та туман Давлат хизматлари марказларида тажриба синов тариқасида сурдо-онлайн планшетлари (махсус электрон мосламаси) ишга туширилди.
Давлат хизматлари агентлиги Тошкент шаҳар бошқармаси ахборот хизмати раҳбари Ойбек Ҳасановнинг маълум қилишича, Давлат хизматлари марказларининг кириш қисмларида, фуқароларни қабул қилиш бурчакларида ҳамда сурдо-онлайн планшетлари жойлашган операторларнинг иш столига махсус белгилар жойлаштирилган.
«Махсус белгилар ўз навбатида Давлат хизматлари марказларига ташриф буюрган имконияти чекланган шахсларга тўғридан-тўғри сурдо-онлайн планшети жойлашган операторга йўналтиради. Давлат хизматлари марказларига жойлаштирилган сурдо-онлайн планшетлари бевосита онлайн тарзда, яъни интернет коммуникация тизими орқали доимий равишда ишлайди ва тўғридан-тўғри операторга таржима қилади», – деди Ойбек Ҳасанов.
Унинг қўшимча қилишича, келгусида ушбу тизимни республиканинг барча ҳудудларида жойлашган Давлат хизматлари марказларида ҳамда Фуқаролик ҳолати далолатномаларини ёзиш органларида жорий қилиш назарда тутилган.
Маълумот учун, Тошкент шаҳрида 3 минг нафардан ортиқ эшитишида ва гапиришида нуқсони бор шахслар рўйхатга олинган.
Изоҳ (0)