Ўзбекистон ҳудудидаги магистрал газ қувурлари ҳимоя зонасида 2 минг 425 та ноқонуний қурилмалар аниқланди. Бу ҳақда Саноат хавфсизлиги давлат қўмитаси ахборот хизмати «Дарё»га маълум қилди.
Қўмита томонидан берилган маълумотга кўра, табиий газ қувурлари тизимининг ҳолати ва ушбу соҳага оид қонун ҳужжатларининг ижро этилиши юзасидан ўрганишлар олиб борилган. Ўрганишлар натижасида
- Бухоро вилоятида 573 та,
- Тошкент вилоятида 354 та,
- Жиззах вилоятида 348 та,
- Самарқанд вилоятида 248 та,
- Сирдарё вилоятида 185 та,
- Сурхондарё вилоятида 178 та,
- Навоий вилоятида 172 та,
- Қорақалпоғистонда 137 та,
- Наманган вилоятида 87 та,
- Фарғона вилоятида 82 та,
- Қашқадарё вилоятида 30 та,
- Андижон вилоятида 29 та,
- Хоразм вилоятида 3 та ноқонуний қурилмалар аниқланган. Бу ўтган 2019 йилга нисбатан 312 тага кўп.
«Аниқланган ноқонуний қурилмаларни бузиш ёки бошқа жойларга кўчириш бўйича суд органларига ўрнатилган тартибда даъво аризаларини тақдим этиш ва уларни таҳлил қилиб бориш ишлари «Ўзтрансгаз» АЖ томонидан суст олиб бориляпти. Шунингдек, огоҳлантиришларга қарамасдан Бухоро ва Навоий вилоятларидаги магистрал газ қувурлари ҳимоя зонасидаги 20 дан ортиқ ноқонуний қурилмаларга кадастр идоралари томонидан кадастр ҳужжатлари расмийлаштирилганлиги ҳолатлари ҳам аниқланди», — дейилади қўмита ахборотида.
Қоидага кўра, магистрал газ қувурлари металлининг физик-кимёвий ҳолатини зарур даражада сақлаш ва уларнинг хавфсиз эксплуатациясини таъминлаш учун магистрал газ қувурларида электрокимёвий ҳимоя станциялари бўлиши зарур. Магистрал газ қувурларининг лойиҳаларида кўзда тутилган 2 минг 340 та электрокимёвий ҳимоя станцияларидан, бугунги кунда амалда 1 минг 478 таси ишчи ҳолатда. Электрокимёвий ҳимоя станцияларининг 952 таси белгиланган талабларга жавоб бермаганлиги ва уларда таъмирлаш ишларини бажарилмагани, зарур эҳтиёт қисмлар билан таъминламаганлиги сабабли ишсиз ҳолатда.
Изоҳ (0)