Франция ҳукумати коронавирусга чалинган беморларнинг бир қисмини Германиядаги шифохоналарда даволаш учун жўнатишга ҳозирланмоқда, чунки Франциядаги кўплаб тиббиёт муассасалари касалланганлар оқимини аранг эпламоқда. Бу ҳақда «Интерфакс» хабар берди.
Хусусан, COVID-19 билан касалланиш бўйича кўплаб ҳолатлар қайд этилаётган Нор-Па-де-Кале вилоятидаги беморлар яқин 10 кун ичида Германияга кўчириб ўтказилади. Шунингдек, Германияга Франциянинг бошқа вилоятларидан ҳам беморлар олиб борилади.
Коронавируснинг биринчи тўлқини юз берган март ва апрель ойларида ҳам коронавирусга чалинган кўплаб франциялик беморлар нафақат Германиядаги, балки Австрия, Люксембург ва Швейцариядаги шифохоналарга жўнатилган.
Францияда пандемия бошидан буён 1 460 000 дан ортиқ кишида коронавирус қайд этилган.
Францияда 30 октябрдан 1 декабргача умумий карантин жорий қилинди. Улгуржи савдо муассасалари, мактаблар ва мактабгача таълим муассасалари, мактабдан ташқари машғулотлар ўтказувчи муассасалар, меҳмонхоналар, барча соғлиқни сақлаш муассасалари, жамоат транспорти ўз ишини давом эттиради.
Диний ибодат жойлари очиқ бўлади, бироқ диний маросимлар тақиқланган, 30 кишидан ортиқ бўлмаган киши қатнашадиган дафн маросимлари ва олти киши иштирокидаги никоҳ маросимлари бундан мустасно. Ҳаёт учун ўта муҳим бўлмаган маҳсулотларни сотувчи дўконлар, шунингдек, ресторанлар, кафе ва барлар ёпилган. Умумий овқатланиш шохобчалари овқатни фақат олиб кетиш учун тайёрламоқда.
Аввалроқ Италияда коронавирус сабабли янги чекловлар жорий қилиниши кутилаётгани ҳақида хабар берилганди.
Изоҳ (0)