Нигерия жанубидаги Дельта штатида камида 15 нафар одам номаълум касалликдан вафот этган. Бу ҳақда маҳаллий Vanguard нашри хабар тарқатган.
Қайд этилишича, ўлганлар орасида 18 дан 25 ёшгача бўлган кишилар ҳам бор. Штат маъмурияти аҳолига қилган мурожаатда касаллик тарқалиб кетишининг олдини олиш юзасидан тегишли чоралар кўрилишини ваъда қилган.
«Дельта штати маъмурияти Уте Окпу ҳамда Идумес аҳоли яшаш жойларида кузатилган сирли ўлимлар ҳақида маълумот олди. Губернатор Ифеани Окова штат соғлиқни сақлаш вазирлигига ушбу ҳолатлар юзасидан дарҳол тергов олиб бориш ва ўлимларнинг сабабини аниқлаш, касалликнинг тарқалишининг олдини олиш бўйича топшириқ берган», – дея штат соғлиқни сақлаш соҳаси масалалари бўйича ваколатга эга амалдор Морди Ононе.
Эпидемиологлар вафот этганларнинг оилаларида, улар ётган касалхоналарда бўлиб текширув учун намуналар олган. Улар одамларнинг ўлимига геморрагик иситма сабаб бўлган бўлиши мумкинлигини гумон қилмоқда.
Геморрагик иситма – вирусли касаллик, кучли иситима, геморрагик синдром (қон қусиш, қон кетиши) билан кечади. Ушбу турдаги инфекциялар сирасига Денге безгаги, Эбола ҳамда Ласса безгаги киради.
Эслатиб ўтамиз, 2020 йил февраль ойида Нигериянинг бошқа бир штати Бенуэда номаълум касалликнинг тарқалгани хабар қилинган. Ўшанда 104 киши касалланган, 15 нафар бемор вафот этганди. Маҳаллий шифокорлар бунинг коронавирус эмас, балки бошқа янги касаллик эканини билдирган.
Изоҳ (0)