Тоғли Қорабоғнинг тинч аҳоли яшайдиган ҳудуди Озарбайжон армияси томонидан ўққа тутилиши ҳарбий жиноятларга олиб келиши мумкин. Бу ҳақда БМТнинг инсон ҳуқуқлари бўйича олий комиссари Мишель Бачелет маълум қилди, дея хабар берган «Интерфакс-Украина».
Бачелет БМТнинг аввал ҳам мазкур низо иштирокчиларини огоҳликка чақиргани ва фуқаролик инфратузилмаларининг вайрон бўлиши, инсонларнинг ҳалок бўлишига олиб келувчи ҳодисаларнинг олдини олиш чораларини кўришга чақирганини эслатган.
«Бунинг ўрнига уйлар вайрон қилинган, кўчалар харобага айланган, одамлар эса қочиш ва ертўлаларда жон сақлашга мажбур бўлмоқда», – деган Бачелет.
БМТ вакили шунингдек Озарбайжон ҳарбийларининг икки нафар арман аскарини осаётгани ҳақида тарқалган видеоёзувлар туфайли хавотир кескин ортганини билдирган.
«Гарчи ижтимоий тармоқларда тарқалаётган суратларнинг аксарияти ёлғон бўлса ҳам, Озарбайжон ҳарбийлари томонидан арман аскарларини қийноққа солиниши ва осилиши ҳақида тарқалган видеоёзувлар хавотирни кучайтирмоқда, улар журналистик ташкилотлар текшируви ва терговни талаб қилади», – дея таъкидлаган БМТ комиссари.
Аввал Европада хавфсизлик ва ҳамкорлик ташкилотининг Минск гуруҳи Арманистон ва Озарбайжон ташқи ишлар вазирлари Женевада учрашув ўтказган ҳамда Тоғли Қорабоғдаги фуқаролик объектларига ўт очмасликни келишиб олганди.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган иккита уринишга қарамасдан, 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.
19 октябрда Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилган. Кейинроқ Пашинян Тоғли Қорабоғда Россия учун бевосита хавф солувчи Сурия террорчилик гуруҳлари жангарилари бўлганлиги учун Москва у ерда аксилтеррорчилик операцияларини ўтказиш учун асосга эга эканлигини айтган.
Изоҳ (0)