АҚШдаги президент сайловларида Дональд Трамп Флоридада — асосий «иккиланаётган» штатлардан бирида кўпчилик овозни қўлга киритди, у ерда ғолибни олдиндан айтиш энг қийин бўлаётган эди.
Бюллетенларнинг 94 фоизи ҳисоблаб чиқилганидан кейин Трамп овозларнинг 51,2 фоизига, унинг рақиби Жо Байден — 47,8 фоизига эга бўлган, деб ёзади Meduza The New York Times эълон қилган маълумотларга таяниб. Трамп Флоридада Байдендан 400 мингга кўп фуқаронинг овозини қўлга киритган.
CNN қайд этишича, Трампнинг Флоридадаги ғалабаси АҚШ президентлигига даъвогарлик қилаётган ҳар икки номзод сайловда бир-бирига жуда яқин натижага эришишини кўрсатмоқда. Сайловолди сўровлар Байденнинг устунлигини кўрсатган эди.
Флорида ҳиссасига сайлов коллегиясининг 29 овози тўғри келади. Ғалаба учун президентликка номзод камида 270 та овоз тўплаши керак.
Яна бир «иккиланаётган» штат — Огайода (18 та сайловчи) Трамп Байденни 4 фоизга ортда қолдирмоқда. Техасда (38 та овоз) у учта пунктга, Жоржияда (16 та овоз) — 12 та пунктга олдинда бормоқда.
АҚШ президенти сайловида ғолиб тўғридан-тўғри сайловчилар томонидан эмас, балки сайловчилар коллегияси томонидан аниқланади. Жами сайловчилар 538 киши, ғалаба учун 270 кишининг овози керак. Сайловчилар сони ҳар битта штатда аҳоли сонига мос равишда тақсимланади — энг кўп аҳоли яшайдиган Калифорния штати 55 сайловчига эга. Иккинчи энг йирик штат — Техасда 38 сайловчи, Нью-Йорк ва Флоридада — 29 тадан сайловчи бор. Икки поғонали тизимни ҳисобга олганда, номзод умуммиллий даражада камроқ овоз тўпласа ҳам, муайян штатлардаги ғалабаси ҳисобига сайловда ғолиб бўлиши мумкин.
Мавзуга доир:
Изоҳ (0)