Жозеф Байден халққа мурожаат қилиб нутқ сўзлади, уни CNN телеканали трансляция қилди, деб ёзади «РБК». Демократлар партиясидан АҚШ президентлигига номзод ўз ғалабасига ишонишини айтди.
Байденнинг сўзларига кўра, у бир қатор асосий штатларда, шу жумладан, Аризона ва Пенсильванияда ғолиб бўлмоқда. Бундай штатлардан яна бири — Жоржия масаласи ҳозирча ҳал бўлгани йўқлигини тан олди, аммо ўз тарафдорларини сабр қилиб туришга чақирди.
Эслатиб ўтамиз, Дональд Трамп Флоридада — асосий «иккиланаётган» штатлардан бирида кўпчилик овозни қўлга киритди. Яна бир «иккиланаётган» штат — Огайода (18 та сайловчи) Трамп Байденни 4 фоизга ортда қолдирмоқда. Техасда (38 та овоз) у учта пунктга, Жоржияда (16 та овоз) — 12 та пунктга олдинда бормоқда.
АҚШда 3 ноябрь куни президент сайловлари бўлиб ўтмоқда. Амалдаги президент — Дональд Трамп иккинчи муддатга даъвогарлик қилмоқда. Унинг асосий рақиби — АҚШ собиқ вице-президенти, демократ Жо Байден. Коронавирус пандемияси туфайли америкаликларнинг кўпчилиги почта орқали овоз берди.
Дастлабки натижалар ва прогнозларга кўра, айни пайтда Трамп жами 153, Байден эса 182 та овозни қўлга киритган.
АҚШ президенти сайловида ғолиб тўғридан-тўғри сайловчилар томонидан эмас, балки сайловчилар коллегияси томонидан аниқланади. Жами сайловчилар 538 киши, ғалаба учун 270 кишининг овози керак. Сайловчилар сони ҳар битта штатда аҳоли сонига мос равишда тақсимланади — энг кўп аҳоли яшайдиган Калифорния штати 55 сайловчига эга. Иккинчи энг йирик штат — Техасда 38 сайловчи, Нью-Йорк ва Флоридада — 29 тадан сайловчи бор. Икки поғонали тизимни ҳисобга олганда, номзод умуммиллий даражада камроқ овоз тўпласа ҳам, муайян штатлардаги ғалабаси ҳисобига сайловда ғолиб бўлиши мумкин.
Изоҳ (0)