Туркиядаги зилзилада ҳалок бўлганлар сони 100 кишига етди

30 октябрь куни Туркия ғарбида юз берган зилзила қурбонлари сони 100 кишига етди, деб ёзади Meduza маҳаллий НТВ телеканалига таяниб.

Қутқарув хизматлари берган сўнгги маълумотларга кўра, яна 994 киши турли даражада жароҳатланган, улардан 147 нафари касалхоналарда қолмоқда.

30 октябрь куни тушдан кейин Туркиянинг ғарбий қисмида 6,6 балли зилзила содир бўлди. Зилзила эпимаркази Эгей денгизида, Измир вилоятининг Сефериҳисар шаҳри яқинида бўлган.

Измирда камида 20 та бино қулаб тушгани хабар қилинди. Зилзила кичик сунамини келтириб чиқарди, оқибатда Сефериҳисарнинг қирғоқ кўчаларини сув босди.

Зилзила кучи Греция оролларида ҳам сезилди. Грек сейсмологлари унинг кучини 6,9 балл деб баҳолади. Зилзила оқибатида Грециянинг Самос оролида икки киши ҳалок бўлди ва 20 киши жароҳат олди. Оролда 6 ойлик фавқулодда ҳолат эълон қилинди.

Туркия президенти Ражаб Тоййиб Эрдўғон давлатнинг барча зарур ресурслари зилзила оқибатларини бартараф қилишга йўналтирилишини айтди. Давлат раҳбари бошпанасидан ажралган фуқароларнинг барчасига янги хонадонлар берилишини таъкидлади.