Ўзбекистонда маъмурий ҳуқуқбузарликлар тўғрисидаги ишларни кўриб чиқиш ваколати судлардан ички ишлар органлари профилактика инспекторларига ўтказилиши мумкинлиги ва бу ўзгаришни назарда тутувчи «Маъмурий жавобгарлик тўғрисидаги кодексга ўзгартиришлар киритиш тўғрисида»ги қонун лойиҳаси Олий Мажлис Қонунчилик палатасида муҳокама қилинаётгани ҳақида хабар берилганди.
Депутат Расул Кушербаевнинг маълум қилишича, мазкур қонун лойиҳаси Олий Мажлис Қонунчилик палатасида депутатлар томонидан қайтарилди.
Қонун лойиҳасида қатор маъмурий ҳуқуқбузарликлар, шу жумладан, ёввойи нашаларни йўқ қилиб юбориш чораларини кўрмаганлик, ит ва мушук боқиш қоидаларини бузиш, ҳайвонларга нисбатан шафқатсиз муносабатда бўлиш тўғрисидаги ишларни кўриб чиқиш ваколати судлардан ички ишлар органлари профилактика инспекторларига ўтказилиши таклиф этилаётганди.
Депутатлар мазкур ўзгариш инсон ҳуқуқларини таъминлашда одил судловни амалга оширишга зид келиши, коррупция аломатларининг келиб чиқишига олиб келиши, ҳуқуқни қўллашда субъективлик пайдо бўлиши, профилактика инспекторларига норасмий режалар қўйилишига ҳамда фуқароларда эътирозлар пайдо бўлишига сабаб бўлиши мумкинлиги каби важларни билдириб ўтди.
Овоз бериш натижасига кўра, депутатларнинг аксарият қисми қонун лойиҳасига қарши чиқди ва лойиҳани қабул қилиш рад этилди.
Аввалроқ Маъмурий жавобгарлик тўғрисидаги кодексга ўзгартириш киритиш тўғрисидаги қонун Президент томонидан имзолангани ва унга кўра эндиликда эпидемияларга қарши курашиш қоидаларини бузиш (54-модда) билан боғлиқ маъмурий ишлар ички ишлар органлари томонидан ҳам кўриб чиқилиши мумкинлиги белгиланган эди.
Изоҳ (0)