Тошкент вилоятида 200 қути «Ремдесивир» дорисини жами 170 миллионга сотган шахс қўлга олинди

Тошкент вилоятида 200 қути «Ремдесивир» дорисининг ҳар бирини 850 мингдан сотган шахс ушланди, дея хабар бермоқда Бош прокуратура «Дарё»га.

Маълум қилинишича, Бош прокуратура ҳузуридаги Департамент ва Давлат божхона қўмитасининг Тошкент вилояти бошқармалари томонидан тезкор тадбир ўтказилган.

Тадбир давомида фуқаро Ж.А. томонидан пандемия шароитида мўмай даромад орттириш мақсадида коронавирус инфекциясини даволашда фойдаланиладиган «Ремдесивир фор Injection» номли дори воситасини дорихона ва унинг филиалидан ташқарида ҳар бир қутисини 850 минг сўмдан ҳисоблаб, 200 қутини жами 170 миллион сўмга сотган вақтида ушланган.

Терговга қадар текширувда Ж.А. «Ремдесивир фор Injection» дориларини қайта сотиш мақсадида фуқаро М.К.дан харид қилганлиги аниқланган.

Мазкур ҳолат юзасидан Ж.А. ва М.К.га нисбатан Жиноят кодексининг 186-моддаси 3-қисми «а» банди (жуда кўп миқдорда дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.

Эслатиб ўтамиз, «Ремдесивир» Европа Иттифоқида рухсат олиш учун тавсия қилинган коронавирусга қарши илк дори воситаси ҳисобланади. Жанубий Корея ҳам 1 июлдан бошлаб мазкур дори воситасини сотиб олишни бошлаганди. Ўзбекистонда ҳам профилактика, касалликнинг юқишининг олдини олиш мақсадида ишлатиш мумкин бўлган дорилар қаторида «Ремдесивир» бор. ЖССТ уни коронавирусга қарши курашда «умид уйғотувчи» дори воситаси деб атаган. Препарат коронавирус кўпайишини блоклаш хусусиятига эга эканлиги канадалик олимлар томонидан апрель ойида аниқланганди. АҚШ «Ремдесивир» препаратининг деярли барча захирасини сотиб олаётганини маълум қилганди.

АҚШ президенти Дональд Трамп ҳам коронавирусдан «Ремдесивир» дориси орқали даволанган. Америка президентини даволовчи шифокор Шон Конлининг маълум қилишича, Трампнинг организмида кислород даражаси 93 фоизгача тушиб кетганидан сўнг дексаметазон қўлланилган. Шифокорлар стероидни 3 октябрь куни «Ремдесивир» препаратининг иккинчи дозаси билан бирга қўллашни бошлаган, Трампда иккиламчи таъсирлар аниқланмаган.

Аввалроқ Тошкент шаҳрида 60 қути «Ремдесивир» дорисини 60 миллион сўмга сотаётган шахслар қўлга олингани хабар қилинганди.