Сурхондарё вилоятида МЧЖ раҳбарига завод қуриши учун банкдан кредит олиб беришни ваъда қилган бир гуруҳ шахс қўлга олинди, дея хабар қилмоқда Бош прокуратура «Дарё»га.
Бош прокуратура ҳузуридаги Департамент ва ДХХнинг Сурхондарё вилоят бошқармалари томонидан тадбиркорлик субъектларининг қонуний ҳуқуқ ва манфаатларини ҳимоя қилиш юзасидан тадбир ўтказилди.
Тадбир давомида фуқаро М.М. ва бошқалар «З.А.» МЧЖ раҳбари Р.га ёғ ишлаб чиқариш заводини қуриши учун банк муассасасида ишловчи танишлари орқали 2,8 миллиард сўм кредит чиқартириб бериш эвазига 15 000 АҚШ долларини олган вақтида ашёвий далил билан ушланган.
Мазкур ҳолат юзасидан М.М. ва бошқаларга нисбатан Жиноят кодексининг 168-моддаси 4-қисми (уюшган гуруҳ томонидан ёки унинг манфаатларини кўзлаб содир этилган фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Хоразмда 3 гектар ерни бир фуқаро номига расмийлаштириб бериш учун 40 минг доллар пора олган МЧЖ раҳбари, Тошкентда электрон аукцион савдоларидан машиналар харид қилиб беришни ваъда қилиб, фуқарони 74 000 долларга чув туширган шахс ва Тошкентда жарима тўламаслик эвазига фуқародан 300 доллар сўраган газ таъминоти идораси ходимлари қўлга олингани ҳақида хабар берилганди.
Изоҳ (0)