Фарғона вилояти Бешариқ туманида Lacetti ҳайдовчиси эътиборсизлик сабаб 8 ёшли қизалоқни уриб юборди. Бу ҳақда ИИВ ЙҲХББ ахборот хизмати хабар берди.
Маълумотларга кўра, 30 октябрь куни соат 11:40 ларда Lacetti ҳайдовчиси Бешариқ туманидаги 22-умумий ўрта таълим мактаби қаршисидаги пиёдалар ўтиш йўлагидан ўтаётган 2-синф ўқувчисини уриб юборган. Кўрсатилган тиббий ёрдамга қарамай, қизалоқ шифохонада вафот этган.
Таъкидланишича, йўл-транспорт ҳодисаси ҳайдовчининг пиёдага йўл бермагани сабабли содир бўлган. Ҳозирда ҳолат юзасидан суриштирув ва тергов ҳаракатлари олиб борилмоқда.
Аввалроқ Наманганда Chevrolet Tracker 6 ёшли болани уриб юборгани ва болакай шифохонада вафот этгани, шунингдек, Тошкентда Spark тўсатдан йўлга чиқиб қолган 2 ёшли болани уриб кетгани ва болакай олинган тан жароҳатлари оқибатида вафот этгани тўғрисида хабар берилганди.
Изоҳ (0)