Сурхондарёда ЙПХ ходимлари дадасининг Nexia русумли машинасини бошқариб кетаётган 13 ёшли болани тўхтатди. Болакай билан олиб борилган тушунтириш ишлари тасвирланган видео билан ИИВ ЙҲХББ ахборот хизмати бўлишган.
Видеодан кўриш мумкинки, йўлда ҳаракатланиб кетаётган Nexia автомобили йўл-патруль хизмати инспекторининг талаби билан тўхтатилган. Ҳайдовчи ўриндиғида эса вояга етмаган шахс — мактабнинг 7-синфида ўқийдиган 13 ёшли йигит ўтиргани аниқланган.
Йигитчанинг сўзларига кўра, у қўшнисининг аҳволи ёмонлашиб қолгани, бу вақтда эса дадаси спиртли ичимлик ичгани сабаб машинани ўзи бошқаришга мажбур бўлган.
Йўл-патруль хизмати ходимлари томонидан ўсмирга ҳайдовчилик гувоҳномасини олмасдан туриб машина бошқармаслик тўғрисида тушунтириш ишлари олиб борилган.
Аввалроқ Ўзбекистонда 2020 йил январь ойидан сентябрь ойигача 4294 та йўл-транспорт ҳодисаси содир бўлгани тўғрисида хабар берилганди. ЙТҲларнинг 1,7 фоизи маст ҳолда рулга ўтириш оқибатида келиб чиққан.
Изоҳ (0)