Андижон вилоятидаги ташкилот масъуллари 2020 йилнинг ўтган даври мобайнида давлат хизматлари кўрсатилиши борасида 7870 та ҳолатда қонунга зид ҳаракат қилган. Бу ҳақда «Дарё» мухбири Умиджон Мамарасулов хабар берди.
Давлат хизматлари агентлиги вилоят бошқармаси бошлиғи Маҳмуджон Абдижалиевнинг маълумот беришича, бошқарманинг давлат органлари ва бошқа ташкилотлар томонидан давлат хизматлари кўрсатилиши устидан назорат қилиш бўлими томонидан 2020 йилнинг ўтган даври мобайнида жами 7870 та қонун бузилиш ҳолати аниқланган.
Уларнинг 5535 таси муддатни бузиш, 253 таси тўғридан-тўғри хизмат кўрсатиш, 19 таси асоссиз рад қилиш, 1 таси ортиқча ҳужжат талаб қилиш ва 2047 таси бошқа тусдаги қонун бузилишларни ташкил қилган.
Аниқланган ҳолатлар юзасидан 142 та ёзма огоҳлантириш ва 13 та тақдимнома киритилган ҳамда давлат хизмат кўрсатувчи ташкилотларининг мансабдор ва масъул ходимларининг 156 нафарига нисбатан маъмурий баённома расмийлаштирилиб, улар тегишли тартибда маъмурий жазога тортилган. Шунингдек, 31 нафар ходимга нисбатан интизомий таъсир чоралари қўлланилиб, уларнинг 15 нафарини маъмурий жавобгарликка тортилиши таъминланган.
Қўшимча қилинишича, давлат хизматларини кўрсатишдаги ноқонуний ҳаракатлар бўйича биринчи учликдан 2118 та ҳолат билан соғлиқни сақлаш муассасалари, 1939 та ҳолатда «Ҳудудгаз Андижон» газ таъминоти филиали корхоналари ҳамда 1629 та қонун бузиш билан ер ресурслари ва давлат кадастри идоралари жой олган.
Изоҳ (0)