Канаданинг Kijiji портали орқали 1966 йилда ишлаб чиқарилган ва ҳозирга қадар идеал ҳолатда сақланган қора «ГАЗ-21» сотувга қўйилди. 1990 йиллар охирида автомобиль қисман модификацияга учраган бўлиб, унга Toyota’нинг V6 двигатели ўрнатилган, деб хабар беради Motor.
Сотувчининг сўзларига кўра, савдога қўйилган «ГАЗ-21» бой тарихга эга. Собиқ Иттифоқ даврида «Волга» КГБнинг Бразилиядаги элчихонаси ҳисобида турган бўлиб, у ерда 30 йилга яқин хизмат қилган. 90 йиллар ўртасида автомобиль Россияга келиб қолган ва у қисман реставрация қилинган, шунингдек, мотори Toyota Таcомаънинг V6 двигателига алмаштирилган.
Реставрация давомида унинг сўнгги эгаси машинага кондиционер ўрнатган, «стартёр»ини алмаштирган, шунингдек, электр узатмаларини таъмирлаган. Шундан сўнг «Волга» АҚШга юборилган бўлиб, унинг янги эгаси автомобилдан жуда кам фойдаланган ва уни иссиқ гаражда сақлаган.
«ГАЗ-21»нинг кузови ва оригинал салони идеал ҳолатда сақланган. Япон мотори 54 ёшли «Волга»нинг соатига 110 километргача тезликда ҳаракатланишини таъминлайди. Бироқ эълонга қарамай, сотувчи ўз автомобили билан 2021 йилнинг ёзида хайрлашишга тайёр. Шу сабабли ҳозирда машина нархи номаълум.
Эслатиб ўтамиз, июль охирларида Россияда КГБ ходимлари учун яратилган В8 двигателли ноёб «Волга» сотувга қўйилган эди.
Изоҳ (0)