Kanadaning Kijiji portali orqali 1966-yilda ishlab chiqarilgan va hozirga qadar ideal holatda saqlangan qora “GAZ-21” sotuvga qo‘yildi. 1990-yillar oxirida avtomobil qisman modifikatsiyaga uchragan bo‘lib, unga Toyota’ning V6 dvigateli o‘rnatilgan, deb xabar beradi Motor.
Sotuvchining so‘zlariga ko‘ra, savdoga qo‘yilgan “GAZ-21” boy tarixga ega. Sobiq Ittifoq davrida “Volga” KGBning Braziliyadagi elchixonasi hisobida turgan bo‘lib, u yerda 30 yilga yaqin xizmat qilgan. 90-yillar o‘rtasida avtomobil Rossiyaga kelib qolgan va u qisman restavratsiya qilingan, shuningdek, motori Toyota Tacoma’ning V6 dvigateliga almashtirilgan.
Restavratsiya davomida uning so‘nggi egasi mashinaga konditsioner o‘rnatgan, “startyor”ini almashtirgan, shuningdek, elektr uzatmalarini ta’mirlagan. Shundan so‘ng “Volga” AQShga yuborilgan bo‘lib, uning yangi egasi avtomobildan juda kam foydalangan va uni issiq garajda saqlagan.
“GAZ-21”ning kuzovi va original saloni ideal holatda saqlangan. Yapon motori 54 yoshli “Volga”ning soatiga 110 kilometrgacha tezlikda harakatlanishini ta’minlaydi. Biroq e’longa qaramay, sotuvchi o‘z avtomobili bilan 2021-yilning yozida xayrlashishga tayyor. Shu sababli hozirda mashina narxi noma’lum.
Eslatib o‘tamiz, iyul oxirlarida Rossiyada KGB xodimlari uchun yaratilgan V8 dvigatelli noyob “Volga” sotuvga qo‘yilgan edi.
Izoh (0)