Канберралик радиобошловчи Аннабел Бретт Tesla мобил дастури ёрдамида нафақат электрокари ўғирланишининг олдини олди, балки полицияга ўғриларни тушишга ҳам ёрдам берди, деб ёзади Motor.
Ўтган ҳафта Бреттнинг смартфонига Model 3 машинасининг сигнализацияси ишлаб кетгани тўғрисида хабар келган. Аёл ишхонада бўлгани сабаб дўстидан электрокаридан хабар олиб қўйишни сўраган, бироқ машина ўз жойида бўлмаган.
Шунда Бретт автомобилнинг жойлашган ўрнини кузатувчи Tesla мобил иловасини очиб, ўғрилар ҳали узоққа кетмаганини кўрган. Аёл полицияга қўнғироқ қилиб, ўзининг Tesla’си ўғирланганини маълум қилган ва дўстининг машинасида уларнинг ортидан тушган.
«Мобил дастур масофадан туриб автомобиль ҳаракатини секинлатиш ва ҳатто у билан бироз ‘ўйнаш’ имконини беради. Ўғриларни таъқиб қилиш вақтида мен Tesla ойналарини тушириб-кўтариб, овозли сигнални мунтазам ёқиб уларга бор имкониятим билан халақит бердим», — дейди Бретт.
Омадсиз ўғрилар орадан бироз вақт ўтгач Tesla’ни ташлаб, қочиб кетган. Аммо улар ҳуқуқ-тартибот ходимларидан яширинишга улгурмаган: ўғрилардан бири электрокар салонида ҳайдовчилик гувоҳномаси ва уйининг манзили ёзилган конвертни тушириб қолдирган. Бундан ташқари, Model 3’нинг борт камераси жиноятчиларни видеога ҳам олган. Натижада ўғрилар тезда топилиб, қўлга олинган.
Эслатиб ўтамиз, шу йилнинг май ойида Калифорнияда Tesla эгаси машинасини ўғирлашга уринган шахсни смартфон ёрдамида салонга қамаб қўйганди.
Изоҳ (0)