Starlink интернетини синовдан ўтказаётганлар Starlink Team’дан сунъий йўлдош интернети ва буюртмаларни бериш имкониятига оид батафсил маълумотлар ёзилган расмий хатларни олди. Бу ҳақда Reddit тармоғига таяниб, Spot хабар берди.
Хатлар «Better Than Nothing Beta» сарлавҳаси (йўқдан кўра, яхшироқ) билан бошланган. Шу орқали жамоа тестдан ўтказаётган инсонларнинг тармоқлардаги норасмий маълумотлар асосида шаклланган тасаввурларидаги кутилган натижани пасайтиришга уринган.
Хабарга кўра, бета-тест жараёнида Starlink интернети 50 Мбит/сониядан 150 Мбит/сониягача тезликда ишлайди, кечикиш вақти эса 20-40 миллисонияни ташкил этади. Шу билан бирга, тестдан ўтказаётганлар интернет умуман бўлмаслиги ҳолатларидан ҳам огоҳлантирилган.
Starlink жамоасининг маълум қилишича, янги сунъий йўлдошларнинг учирилиши ердаги янги станцияларнинг ишга туширилиши ҳамда дастурий таъминот устидаги ишлар сабаб интернет яхшироқ ишлай бошлайди. Хусусан, 2021 йилнинг ёзига бориб кечикиш вақтида 16-19 миллисония даражасига тушади.
Хабарда таъкидланишича, Starlink қирувчи самолётларга ўрнатилганидан яхшироқ «FAR» антенналарини сотувга чиқаради. У билан бирга Wi-Fi роутерни ўрнатишга мўлжалланган штатив ҳам етказиб берилади. Қурилма жамланмаси 499 долларни ташкил этади, бир ойлик обуна эса 99 доллар.
Аввалроқ АҚШнинг SpaceX космик компанияси Falcon 9 узаткич-ракетаси воситасида яна 60 та Starlink сунъий йўлдошини коинотга учиргани тўғрисида хабар берилганди. Бу лойиҳа доирасидаги 15-парвоз, айни вақтда орбитада 900 та Starlink сунъий йўлдошлари учиб юрибди.
Изоҳ (0)