Наманганда Damas уриб кетган пиёда бош миясидан оғир жароҳат олиб, шифохонада вафот этди

Наманган вилояти Наманган туманида Damas йўлдан ўтаётган пиёдани уриб кетди, дея хабар бермоқда ИИВ.

Қайд этилишича, 23 октябрь куни соат 20:30 ларда Наманган тумани «Анжирзор» МФЙнинг ички йўлида Damas автомашинасини бошқариб бораётган ҳайдовчи ҳаракат хавфсизлигини таъминлай олмай, йўлни кесиб ўтаётган пиёдани уриб юборган.

Натижада пиёда қўшма шикаст, бош мия ёпиқ шикасти, бош мия оғир даражали лат ейиши ташхиси билан шифохонага ётқизилган. Кўрсатилган тез тиббий ёрдамга қарамай, жабрланувчи 24 октябрь куни соат 09:00 да вафот этган.

Ушбу ҳолат бўйича туман ИИБ ҳузуридаги Тергов бўлинмаси томонидан Жиноят кодексининг 266-моддаси 2-қисми (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.

Аввалроқ Жиззахда ёритиш чироқларисиз ҳаракатланган Cobalt юк машинасига урилиши оқибатида бир киши, Фарғонада автомобиль бошқарувини йўқотиб, дарахтга урилган 16 ёшли ҳайдовчи, Андижонда Damas юк машинасига урилиши оқибатида вояга етмаган йўловчи ва Чилонзорда автомобиль бошқарувини йўқотиб, дарахтга урилган 21 ёшли ҳайдовчи ҳалок бўлгани ҳақида хабар берилганди.