Ўзбекистон Президенти ички ишлар органлари ходимлари куни муносабати билан бир гуруҳ соҳа вакилларини мукофотлагани тўғрисида хабар берилганди. Фармон билан ўз хизмат вазифасини бажариш вақтида ҳалок бўлган икки нафар ички ишлар ходими ҳам «Жасорат» медали билан мукофотланди.
Президент фармони билан мукофотланганлар орасида Тошкент шаҳар Ички ишлар бош бошқармасининг йўл ҳаракати хавфсизлиги бошқармаси йўл-патруль хизмати собиқ инспектори марҳум Салим Умаров ҳам бор. Шу йилнинг сентябрь ойида ЙТҲ қурбонига айланган инспектор «Жасорат» медалига лойиқ кўрилган.
Эслатиб ўтамиз, Салим Умаров 1 сентябрь куни содир бўлган ЙТҲ оқибатида вафот этганди. Уни Тошкентда 19 ёшли йигит Lacetti’да уриб юборган ва инспектор шифохонанинг реанимация бўлимига ётқизилган, кейинроқ Умаров олинган тан жароҳатлари оқибатида вафот этган.
Шунингдек, 2020 йил 5 сентябрь куни ЙТҲ оқибатида вафот этган Самарқанд вилоятининг Пастдарғом тумани ИИБ профилактика инспектори Равшан Боқиев ҳам «Жасорат» медали билан тақдирланган.
Эслатиб ўтамиз, 1 сентябрь куни Пастдарғом тумани ИИБ профилактика инспектори Равшан Боқиев туман ҳудудидан ўтган 4Р-46 автомобиль йўлида хизмат ўтаётган вақтида ҳайдовчиси спиртли ичимлик таъсирида бўлган Damas автомашинаси инспектор ва 2 нафар фуқарони уриб юборган эди. Кўрсатилган тиббий ёрдамга қарамасдан ИИБ инспектори олинган тан жароҳатлари оқибатида вафот этган.
Маълумот учун, Пастдарғом тумани ички ишлар бўлимида 6 йил хизмат қилган Равшан Боқиев ички ишлар тизимидаги фаолиятини 2014 йилда туман ИИБ қўриқлаш бўлимида бошлаб, 2017 йилдан профилактика инспектори вазифасида давом эттирган.
Изоҳ (0)