Американинг Boston Dynamics компанияси томонидан яратилган Spot робот-ити биринчи бор Чернобиль ҳудудида синовдан ўтказилди, деб хабар беради IXBT.
Синов Бристол университети тадқиқот гуруҳи ҳамда «Радиоактив чиқиндилар билан ишлаш бўйича марказий корхона» ихтисослашган давлат ташкилоти мутахассислари билан ҳамкорликда ўтказилган.
Шунингдек, учувчисиз бошқариладиган учиш қурилмалари, ерда ҳаракатланувчи робот тизимлар, ҳудуддаги радиоактив материаллар тарқалишини баҳоловчи сканер-датчиклар, жумладан, фотограмметрия, лидар, гамма-спектрометр, гиперспектрал ва нейрон датчиклардан фойдаланилган.
Хусусан, «Рижий лес» радиоактив чиқиндиларни вақтинча сақлаш пунктидаги иккита секторда, шунингдек, радиоактив чиқиндилар кўмилган «Подлесний» ва «Буряковка» пунктларида радиометрик ва геофизик ишлар амалга оширилган.
Мутахассислар тадқиқотлар якунида 3D форматда тасвирларни қўлга киритиш ва радионуклидлар фаоллигининг тарқалиши харитаси, шунингдек, «Рижий лес»нинг зарарланган ҳудудлари тасвирларини олишни режалаштирмоқда.
Аввалроқ Boston Dynamics’нинг робот-ити 74,5 минг доллардан сотувга чиққани, у Сингапур боғида одамлар орасидаги оралиқ масофани текширишни бошлагани тўғрисида хабарлар берилганди.
Мавзуга доир: Видео: Boston Dynamics роботи чўпонлик қилиши мумкин
Изоҳ (0)