Samsung Electronics бошқарув раиси Ли Гон Хи Сеулдаги касалхонада вафот этди, деб хабар бермоқда «Коммерсантъ». Сўнгги бир неча йил давомида саломатлиги билан боғлиқ муаммолар туфайли Ли Гон Хи компаниянинг расмий раҳбари бўлиб қолган, аслида эса концернни унинг ўғли Ли Чже Ён бошқариб келарди.
«Ryonxap» агентлиги аниқлик киритишича, сўнгги бир неча йил мобайнида Ли Гон Хи касалхонада ётган. Саломатлиги ёмонлашишига 2014 йилда бошидан кечирган юрак хуружи сабаб бўлган.
«Раис Ли Samsung’ни маҳаллий бизнесдан етакчи дунё новаторига ва саноат гигантига айлантира олган олдиндан кўра билувчи инсон эди. Унинг 1993 йилдаги «янги менежмент» ҳақидаги баёноти компаниянинг глобал жамият ривожи учун энг яхши технологияларни тақдим этиш бўйича фаолиятида ҳаракатга келтирувчи куч ролини ўйнади», — дейилади концерн баёнотида.
Ли Гон Хи 1942 йил 9 январда туғилган. Унинг отаси — Ли Бён Чхоль Samsung Electronics асосчиси бўлган. Ли Гон Хининг ўзи 1968 йилда концернга келиб қўшилган, 1987 йилда унинг раҳбарига айланган. 2008 йилда суд уни солиқларни тўлашдан бош тортганликда айблаб, шартли ҳибсга маҳкум этгани сабабли истеъфога чиқишга мажбур бўлган. Кейинроқ Жанубий Корея Олий суди ҳукмни бекор қилган. 2010 йилда Ли Гон Хи концерн бошқарувига қайтган. Forbes ҳисоб-китобларига кўра, 12,6 миллиард долларлик соф фойда билан Ли Гон Хи ва унинг оиласи дунёнинг энг бой одамлари сафига киради.
Изоҳ (0)