Андижон вилояти Бўстон тумани ҳокими Садбархон Мамитова тумандаги фермерлар билан учрашувда уларни «мараз», «ифлос» деб ҳақоратлаган, соя ўсимлиги билан боғлиқ режани бажармаган фермерларга ерини олиб қўйиш билан таҳдид қилгани акс этган аудиоёзуви тарқалгани ҳақида хабар берилганди. Андижон вилояти ҳокимлиги ушбу ҳолат юзасидан расмий муносабат билдирди.
«Ижтимоий тармоқлардаги Бўстон тумани ҳокими дея айтилаётган аудиоёзув юзасидан ўрганиш ишлари амалга оширилди. Аниқланишича, ҳақиқатан ҳам аудиоёзув Бўстон тумани ҳокими С.Мамитовага тегишли эканлиги, тумандаги соя етиштирувчи фермерларнинг соя етиштириш ва уни йиғиб олишдаги масъулиятсизлиги оқибатида туманда соя ҳосилини йиғиштириб олиш ишлари бир мунча ортга сурилганлиги маълум бўлган.
Ушбу ҳолат юзасидан туман ҳокими фермердан нега соя ҳосилини ўз вақтида йиғиб олмасдан, сояни корчёвка қилиб, юлиб ташлашганлигига изоҳ сўраган.
Туманда соя ўсимлигини етиштириш ва уни йиғиб-териб олишда сусткашлик қилаётган ҳамда ўз хизмат вазифасига совуққонлик билан қараётган фермерларнинг фаолияти туман ҳокимининг эътирозларига сабаб бўлганлиги маълум бўлди.
Юқоридаги ҳолатларни инобатга олган ҳолда, тарқалган аудиоёзув учун Бўстон тумани ҳокими С.Мамитовага вилоят ҳокимлиги томонидан огоҳлантириш берилганлигини маълум қиламиз», – дейилади ҳокимлик хабарида.
Туманда 108 та ғалла ва пахта етиштирувчи фермер хўжаликларига жами 36,5 тонна соя ўсимлиги экиш ва етиштириш (500 гектар очиқ майдонга, 300 гектар ғоза қатор орасига) белгилангани маълумот ўрнида эслатиб ўтилган.
Интернетда тарқалган Бўстон ҳокими Садбархон Мамитовага тегишли аудиоёзувда у фермерларга қарата ҳақоратли тарзда мулоқот олиб борган.
Асабий мулоқот давомида ҳоким Мамитова фермерларга: «Кимсан сен, ўзингдан кетган мараз, соя сотмаган ифлос. Пахта қилмайсан, ўзингдан кетиб, ифлос», деб гапираётганини эшитиш мумкин.
Ҳоким «Дарё» мухбири Миролим Исажонов билан суҳбатда «оғзидан чиққан сўзлар учун ўзи ҳам хижолатда» эканини айтган.
Маълумот учун, Садбархон Мамитова 2020 йил 4 март куни «аёлларни ҳоким этиб тайинлаш ойлиги» доирасида Андижон вилояти Бўстон тумани ҳокими этиб тайинланган эди. Бунгача у 2007—2008 йилларда Жалақудуқ тумани ҳокими ўринбосари – туман хотин-қизлар қўмитаси раиси, 2011—2017 йилларда Жалақудуқ тумани Бандликка кўмаклашиш маркази директори, 2019 йилдан «Юксалиш» умуммиллий ҳаракати Андижон вилояти ҳудудий бўлими бошлиғи лавозимларида ишлаган.
Эслатиб ўтамиз, 2020 йилнинг февраль—март ойларида Андижон вилоятининг Бўстон туманидан ташқари, Сирдарёнинг Боёвут, Бухоронинг Олот, Қашқадарёнинг Қарши, Наманганнинг Тўрақўрғон туманларига ва Самарқанд вилоятининг Каттақўрғон шаҳрига аёл ҳокимлар тайинланган эди.
Ушбу тайинловлар Президент Шавкат Мирзиёев ташаббуси билан амалга оширилган. Мазкур тайинловларга муносабат билдираркан, Президент Шавкат Мирзиёев «аёллар бўлган жойда адолат, поклик бўлиши»ни таъкидлаган, уларга ҳеч нарсадан қўрқмасликни тавсия қилган эди.
«Ишонаман — аёллар раҳбар бўлган туманларда адолат байроғи бошқача ҳилпирайди. Биз ҳокимликка сайланган раҳбар аёлларимизга доим ёрдам берамиз, елкадош бўламиз. Бундан кейин ҳам катта-катта ташкилот ва компаниялар раҳбарлигига аёлларни тайинлаш ташаббуси давом этади. Биз уларни тайёрлаяпмиз. Кимларгадир бу иш ёқмас, лекин менга ёқади», – деганди Президент.
Изоҳ (0)