Фото: Шифокорларга аталган Сергелидаги граффити

Тошкентнинг Сергели туманида коронавирусга қарши курашаётган шифокорлар шарафига илк мурални яратилиш жараёни якунланди. Асар Янги Сергели ва Лутфкор кўчалари кесишмасида пайдо бўлган. Бу ҳақда «Зиё форум» илм-фан ва таълим-тарбияни ривожлантириш халқаро фонди «Дарё»га маълум қилди.

Мурал-арт бу – замонавий кўча санъати бўлиб, бунда полотно вазифасини кўп қаватли бино деворлари бажаради.

«Менимча, бу асар пандемия қурбонлари учун ўзига хос ёдгорлик ва улар хотираси учун ҳурмат белгиси бўлди. Яратилган образ – фуқаролар эътиборини яна бир бор шифокорларимиз мардлиги ва жасоратига қаратиш учун имконият», – дейди Сергели тумани ҳокими Элбек Шукуров.

Муралнинг яратилишида шаҳар маъмурияти иш жойи ва транспорт билан таъминлаган. Натижада бир неча кун ичида кўп қаватли бино деворида XXI асрнинг долзарб касаллигидан болани ҳимоя қилаётган шифокор қиз сиймоси пайдо бўлган.

«Ушбу асар орқали вирусга қарши биринчи қаторларда курашаётган ва ўзларининг профессионаллигини намойиш этиб, инсонлар ҳаётини қутқараётган шифокорларга миннатдорлик ҳиссини етказмоқчи эдим. Умид қиламанки, бизнинг ижодий хабаримиз шифокорларимиз ва шаҳар аҳолисига хуш келади», – дейди лойиҳа муаллифи, рассом Ҳасан Майчеев.

Ушбу лойиҳа янги маданий бурилиш бўлиб, барчанинг кўз ўнгида истеъдодли рассомлар томонидан амалга оширилади. «Зиё форум» илм-фан ва таълим-тарбияни ривожлантириш халқаро фонди директори ҳамда лойиҳа раҳбари Бобур Фармоновнинг сўзларига кўра, асар учун жой тасодифан танланмаган.

«Мурал кўринмас душманга қарши курашаётган шифокорлар қаҳрамонлигининг рамзига айланди. Таъкидлаш жоизки, ушбу жой тасодифан танланмаган, кўп қаватли уйдан узоқ бўлмаган масофада коронавирусга чалинган беморларни тақсимлаш маркази мавжуд. Кўпгина шифокорлар икки ой ёки ундан ортиқ муддат давомида уйда эмаслар ва биз ушбу ижодий хабар орқали уларга ўз миннатдорчилигимизни билдирмоқчимиз. Бу лойиҳа фонд ва Сергели тумани ҳокими Элбек Шукуровнинг қўшма пилот лойиҳасидир».

Эслатиб ўтамиз, июль охирларида Тошкентда «Юксалиш» умуммиллий ҳаракати ташаббуси билан Humo Arena фасадида «Ўзбекистон шифокорларига раҳмат» мавзусида флешмоб ўтказилганди.