Режиссёр Адитья Чопранинг дебют иши – «Ўғирланмаган келин» суратга олинганига 25 йил бўлганига қарамай, қайта-қайта кўрса бўладиган ижод намуналари сирасига киради. Бутун дунёда машҳурликка эришган мазкур фильм Filmfare Awards’нинг 41-тақдирлаш маросимида 14 номинация ва 10 мукофотни қўлга киритган. Барча учун севимли бўлган фильм қандай суратга олингани ҳақида маълумот бериб ўтамиз.
Режиссёр аввалига инглиз фильми сифатида, бош қаҳрамонларни Том Круз ва Кажол ижросида тасаввур қилган. Ғоя билан бўлишганида отаси америкалик актёрларсиз ҳинд фильми қилиб, суратга олса, яхши бўлишини тавсия қилган. Насрин Кабирнинг Адитьянинг фильмига бағишланган китобида режиссёр Раж ва Симранни ҳамма томошабин уларга ўхшашни истайдиган севишганлардек қилиб кўрсатишни, йигитлар Симрандек қизни, қизлар эса Раждек йигитни учратишни орзу қилишини хоҳлаганини билдирган.
Ёш ижодий жамоа
Режиссёр жамоасида Амриш Пури, Фарида Жалал, Анупам Кхерни айтмаганда, асосан ёш актёрлар бўлган. 23 яшар актёрга унинг укаси Удай, шунингдек, Каран Жоҳар, Самир Шармалар ёрдам берган. Саҳналаштирувчи рассом Шармита Рой учун «Ўғирланмаган келин» атиги учинчи лойиҳа бўлган. Анаита Шрофф Адажания Симраннинг дугонаси ролини ўйнаган. Кейинчалик у Vogue India журналининг бош раҳбари бўлиб, Дипика Падуконе ва бошқа машҳур актрисалар учун ўзига хос услуб яратган.
Кастинг
Режиссёр Раж ролини аввалига Саиф Али Хонга бермоқчи бўлган. У бошқа бир эсда қоларли севги ҳикоясининг иштирокчиси бўлишга улгурган актёрга роль беришни истамаган. Бу вақтда Амир Хон ва Салмон Хонлар аллақачон бундай ҳикояларнинг иштирокчисига айланиб улгурган бўлган. Режиссёр мухлислар Ражни романтик ижрода кўриниши кутилмаган актёр гавдалантиришини истаган. Бу вақтда Шохруҳ Хон арсеналида «ёмон йигит» роллари бўлган ва Адитья уни бошқача образда оммага кўрсатиб, ҳайрон қолдириши мумкинлигини билган.
Амриш Пури Симраннинг отаси ролига таклиф қилингани ҳам фильмнинг муваффақиятини таъминлаган. Мухлислар тасаввурида асосан салбий қаҳрамон роли билан эсда қолган актёрнинг қизига «Жее ле апни зиндаги» қандай хоҳласанг, шундай яша, деб айтган сўзлари ҳам у ҳақидаги тасаввурни ўзгартириб юборган.
Ражнинг отаси Анупам Кхер, Симраннинг синглиси Пуджа Рупарел, онаси ролини ўйнаган Фарида Жалал ва бошқалар эса фильмнинг янада муваффақиятли чиқишига ҳисса қўшган.
Эски ҳикояни янгича сўзлаб бериш усули
Режиссёрнинг мазкур фильмдаги ютуғи урф-одатлар ва замонавийлик орасидаги балансни топа олган ва буни фильмда мужассам эта олгани ҳисобланади. Унинг дебют лойиҳасидан кейин минглаб ҳинд туристлари бош қаҳрамонлардан ўрнак олган ҳолда Европа бўйлаб саёҳат қилган.
Фильм сценарийси ва диалогларни ҳам режиссёрнинг ўзи ёзган, унга оилавий дўсти Жавед Сиддиқи ёрдам берган. Фильмдаги машҳур ибора «Катта давлатларда ҳам кичик кўнгилсизликлар бўлиб туради» ҳамда Ражнинг Симранни «сенёрита» деб аташ фикри ҳам Жаведга тегишли.
Ҳали ҳамон севиб тингланадиган қўшиқлар
Мазкур фильм Жатин ва Лалитнинг мусиқий карьера борасида омади чопишига сабаб бўлган. Айниқса, «Тужҳе Декҳа Тоҳ Еҳ Жана Санам» лойиҳанинг машҳурликка эришишида муҳим роль ўйнаган.
«Авваллари одамлар мен ва акамни ишини яхши биладиган оддий одам деб ўйлаган, аммо бизни жиддий қабул қилмаган. «Ўғирланмаган келин» тақдим қилинганидан кейин ҳаммаси ўзгарган. Кўп йиллардан кейин ҳам бизнинг қўшиқ қадрланаётганига гувоҳ бўлиб, бу ҳаётга бекорга келмаганимга амин бўламан», — деган Жатин.
Адитья фильмни суратга олиш учун мукаммал тайёрланган: сценарий, суратга олинадиган жойлар, кастинг, диалог, мусиқа ва бошқа ҳар бир майда деталь эътибордан четда қолмаган. У нима хоҳлаётганини аниқ билган. Қўшиқлар муаллифи Ананд Бакши фильм худди Адитья айтганидек суратга олинса, кинопрокатдан тушмаслигини айтган ва шундай ҳам бўлган.
25 йил кинопрокатда
«25 ҳафта ёки 25 ой эмас, 25 йил. Менинг ўғлим премьера бўлганидан икки йил ўтиб, дунёга келган. Бугун у 23 ёшда, фильм эса ҳали ҳамон кинопрокатларда қўйилади», — дейди мусиқий бошқарувчи.
Мумбайнинг Маратҳа Мандир кинотеатрида 2020 йилнинг мартига қадар намойиш қилинган фильм пандемия сабаб барча кинотеатрлар ёпилмаганида, ҳали ҳам намойиш қилинаётган бўларди. Маратҳа Мандир кинотеатри бошқарувчиси бундан бир неча йил аввал фильм кинопрокатдан олинмоқчи бўлганида 40-50 нафар мухлис ғазабланиб, уни экрандан олмасликни талаб қилганини, оқибатда интервью бериб, фильм мухлислар ташриф буюрар экан, намойишдан тўхтамаслигига ваъда беришига тўғри келганини таъкидлайди. Унинг қўшимча қилишича, оддий кунларда «Ўғирланмаган келин»ни кўриш учун залда 45 фоиз, байрам кунлари 70 фоиз томошабин бўлади. Фильмнинг чипта нархи эса бир неча йилдан бери ўзгартирилмайди. Кинозал ёнида вокзал жойлашган ва ташриф буюрган томошабинларнинг ярми автобус ёки поездда сафарга чиқишдан аввал фильмни кўриб кетади. Сеанслар асосан эрталаб ва кундузи бўлади, аксари поезд ва автобуслар эса кечаси йўлга чиқади.
Изоҳ (0)