Пандемия сабабли икки минг нафарга яқин ўзбекистонлик Абхазияда қолиб кетгани, уларнинг юзга яқини айни пайтда Абхазия–Россия чегарасида кўчада тунаётгани ҳақида хабар берилган эди. ТИВнинг 30 сентябрдаги баёнотида 400 га яқин ватандошларнинг биринчи гуруҳи октябрь бошида Ўзбекистонга қайтарилиши айтилганди. Бироқ октябрь ойи охирлаб қолган бўлса-да, ушбу ваъда бажарилмади.
Ўзбекистоннинг Ростов-Дондаги бош консуллиги бош консули Рустам Курганбаев жараён нима учун кечикаётгани, уларни ватанга қайтаришга нималар тўсқинлик қилаётганини «Kun.uz»га маълум қилди.
«23 октябрь куни Москвада Россия Федерацияси ҳукумати раиси ўринбосари Татьяна Голикова раҳбарлигида Махсус комиссиянинг йиғилиши бўлиб ўтган, ушбу йиғилишда Абхазияда қолиб кетган фуқароларимизни Россия орқали Ўзбекистонга қайтариш масаласи муҳокама қилиниши кутилаётган эди. Бироқ Россия Ташқи ишлар вазирлигида шанба-якшанба дам олиш куни бўлгани, расмийлар бу вақтда мурожаатларимизга жавоб бермаётгани учун йиғилишда қандай қарор қабул қилинганини билолмай турибмиз.
«Абхазияда қолиб кетган фуқароларимизнинг Ўзбекистонга қайтарилиши чўзилиб кетганининг сабаби чартер рейслар билан олиб келинадиганлар рўйхатини тузишга кўп вақт кетиб қолди. Ушбу ҳудуддаги ўзбекистонликларни топиб, маълумотларига биттама-битта аниқлик киритиб чиқишга тўғри келган. Айни пайтда рўйхатга 537 нафар киши киритилган. 20-октябр куни бош консулхонамиз томонидан ушбу рўйхат нота орқали Россия Ташқи ишлар вазирлигига тақдим этилган.
Абхазиядан ватанга қайтишни кутаётган ўзбекистонликлар Telegram’да очилган гуруҳда 200 юз киши Ўзбекистонга қайтмоқчи эканини айтиб мурожаат қилди. Шу каби ишлар вақтимизни кўп олиб қўймоқда.
Қолаверса, ишларнинг чўзилишига Россия томонининг жавоби кечикаётгани сабаб бўлмоқда. Бу масалани Россия Федерацияси ҳукумати раиси ўринбосари Татьяна Голикова кўриб чиқиши керак эди. Аслида Россия томонининг мазкур вазиятдан хабари бор, октябрь бошида ўзбекистонликларнинг катта бир гуруҳи Абхазияда қолиб кетгани, уларни чартер рейс орқали олиб чиқиб кетиш режалаштирилаётгани ҳақида расман нота киритганмиз. Ўшанда рўйхатда 329 киши бўлган.
Россия томони Ўзбекистон фуқароларини Абхазиядан олиб чиқиб кетишнинг аниқ механизмлари, чегарада уларни ким кутиб олиши, қайси йўналиш бўйича Россиядан олиб чиқиб кетилиши, бунинг учун талаб этиладиган ҳужжатларни ким тайёрлаши бўйича режа ишлаб чиқилса, рухсат берилишини маълум қилди. Шундан сўнг ҳаракат бошланди, ушбу жараёнда жуда кўп муаммолар борлиги аниқланди.
Жумладан, карантин даврида аксарият фуқароларимизнинг ушбу ҳудудда бўлиш, ишлаш ҳуқуқини бериш ҳужжатлари муддатлари ўтиб кетгани ойдинлашди. Шунингдек, самолётга чиқиш учун йўловчилар COVID-19’га тест топширишлари лозим, бироқ Абхазия ҳудудида бир вақтда 250-300 кишини тестдан ўтказиб, жавобини қисқа муддатда тақдим эта оладиган лабораториялар йўқ экан. Шу сабабли фуқароларимизни тест топширгизмасдан олиб қайтиш бўйича масъуллар билан келишувга эришдик», — дейди Рустам Курганбаев.
Шунингдек, Абхазия–Россия чегарасида тўпланаётган ўзбекистонликлар бизга тинимсиз мурожаат бўлаётганини, улар орасида ортга қайтиш кундан кунга чўзилаётганидан дарғазаб бўлаётганлар ҳам борлигини таъкидлаган.
«Биз ҳам бу масалага тезроқ ечим топиш тарафдоримиз. Аммо биз ҳозир бошқа мамлакат ҳудудидамиз, бу ерда ўйин қоидаларини улар белгилашади. Шу сабабли юртдошларимиздан сабрли бўлишларини, яна озгина кутишларини, ноқонуний ҳаракатлардан тийилишларини сўраб қолардим. Худо хоҳласа, душанба (26 октябрь) куни хушхабар бўлиши кутилмоқда. Чоршанба куни биринчи самолётимиз етиб келади. Унгача барча расмиятчиликлар ҳал бўлса, фуқароларни ватанга қайтаришни бошлаймиз», — дейди у.
Рустам Курганбаев Абхазиядаги ўзбекистонликларни ватанга қайтариш қай тартибда амалга оширилишига ҳам аниқлик киритган.
«Айни пайтда тайёргарликнинг якуний босқичидамиз. Самолётлар ҳам, автобуслар ҳам тайёр. Россия Федерацияси Махсус комиссиясининг рухсатини кутяпмиз. Рухсат берилса, Ростов-Дон шаҳридаги Ўзбекистон бош консулхонаси вакиллари биринчи самолёт учишидан бир кун олдин Сочига борамиз. Москвадаги элчихонадан ҳам маслаҳатчи келиши кутилмоқда. Ўзбекистон фуқароларини чегарада кутиб оламиз ва уларни бепул автобусларда аэропортгача етказиб қўямиз. Режамиз бўйича, кунига битта рейс қўйилиши керак. Uzbekistan Airways билан бу масалани келишиб қўйганмиз. Дейлик, учта самолёт келса, ҳар куни битта рейсда кетадиган фуқароларни Абхазиядан олиб чиқамиз.
Бош консулхонамизнинг рўйхатига киритилган барча Абхазиядан олиб чиқиб кетилади. Хоҳ у аёл бўлсин, хоҳ эркак, хоҳ бемор – ҳеч кимни ташлаб қўймаймиз. Фақат кунига биттадан рейс қўйилади. Рўйхатга кирмаган, ҳозирча Абхазияда қолаётган ўзбекистонликларни ҳам ватанга қайтариш чораларини кўрамиз», — деб таъкидлаган.
Шунингдек, октябрнинг бошидан орасида ҳомиладор аёллар, қариялар, беморлар бор бўлган 20 кишилик дастлабки гуруҳ Абхазиядан олиб чиқиб, Ўзбекистонга юборилганини, буни амалга оширишга бир ой давомида ҳаракат қилинганини, келишувга эришиш қийин бўлганини айтиб ўтган.
Аввалроқ Россиянинг Самара ва Ростов вилоятларидаги палата лагерларда яшаган барча ўзбекистонликлар ватанга қайтарилганди.
Эслатиб ўтамиз, Президент Шавкат Мирзиёев Ўзбекистон мустақиллигининг 29 йиллигига бағишланган тантанали маросимдаги нутқида «Ўзбекистоннинг бирорта фуқароси ўз ҳолига ташлаб қўйилмаслиги»ни маълум қилганди.
Изоҳ (0)