Uzbekistan GTL заводи қурувчиларига бир ойда қанча маош тўланиши маълум қилинди

Uzbekistan GTL бош директори Фахриддин Абдурасулов журналист ва блогерлар билан суҳбатда завод қурилишида ишлаётган ишчиларга бир ойда 43 миллиард сўм ойлик маош тўланишини маълум қилди. Бу ҳақда Энергетика вазирлиги ташаббуси билан ташкил этилган пресс-турда маълумот берилди, дея хабар берди «Дарё» мухбири.

ОАВ вакиллари пресс-тур давомида Uzbekistan GTL бош директори Фахриддин Абдурасуловдан ишчиларга нима учун уч ой давомида маош тўланмагани билан қизиқди. Мазкур саволга жавоб берган масъул ишчиларга уч ойдан буён маош тўланмагани ҳақидаги гап ҳақиқатга тўғри келмаслигини айтди.

«Ишчиларга уч ойлик маош тўланмагани ҳақидаги хабар ҳақиқатга тўғри келмайди. Бу ерда ишчиларга маош тўлашнинг икки хил тартиби йўлга қўйилган. Биринчиси, ишчи бажарган ишига қараб маош олса, иккинчиси, белгиланган иш ҳақи олувчи ишчилар ҳам бор. Бажарган ишига қараб маош олувчи ишчилар ишини бажарган бўлса-да, уни қабул қилиб олувчилар қабул қилишни кечиктиргани сабаб сентябрь ойи учун тўланиши лозим бўлган маош кечиккан. Бунда ишни бажариб топширувчининг ҳам, қабул қилувчининг ҳам айби бор, албатта», — деди Фахриддин Абдурасулов.

Бош директорнинг таъкидлашича, мазкур жараёнда хато-камчиликларга йўл қўйган масъулларга чора кўрилади.

«Ҳозирги кунда бу бўйича ўрганишлар олиб борилди. Хато-камчиликларга йўл қўйган ходимларга чора кўриш масаласи ҳал этилмоқда. Агар ўша масъул катта камчиликка йўл қўйган бўлса, ҳатто ишидан олиш ёки бошқа ишга ўтказиш чораси қўлланилади», — деди Uzbekistan GTL бош директори.

Эслатиб ўтамиз, ижтимоий тармоқлар ва Telegram’даги оммабоп каналларда 21 октябрь куни Enter Engineering компаниясининг Қашқадарё вилояти Ғузор туманидаги объектларидан биридаги ишчиларнинг норозилиги акс этган видеоёзувлар тарқалган. Бу ҳолатни изоҳлаган Enter Engineering компанияси матбуот хизмати ишчилар норозилигига нонушта ўз вақтида берилмагани сабаб бўлганини маълум қилди. Шундан сўнг Энергетика вазирлиги Uzbekistan GTL’даги вазият барқарорлашганини, барча муаммо ва масалалар жойида ижобий ҳал этилганини хабар берди. Завод масъули Шуҳрат Арзиев эса ОАВ вакиллари билан мулоқотда Uzbekistan GTL заводи қурилишидаги ишчиларининг оммавий норозилигига уларнинг иш куни кўпайиб, дам олиш куни ўзгаришсиз қолгани ҳам сабаб бўлганини очиқлади. Мазкур ҳолатга батафсил жавоб беришни ният қилган Энергетика вазирлиги 24 октябрь куни журналист ва блогерлар учун пресс-тур ташкил қилди.