Uzbekistan GTL заводи қурилишида иштирок этаётган ишчиларнинг тўполони пайтида етказилган зарар қандай қопланишига ойдинлик киритилди, дея хабар берди «Дарё» мухбири.
Хабар берилишича, Энергетика вазирлиги томонидан ташкил этилган пресс-турда журналист ва блогерлар ишчилар тўполони пайтида етказилган зарар ва зарарнинг ким томонидан қопланиши билан қизиққан.
Бу саволга жавоб берган Uzbekistan GTL бош директори Фахриддин Абдурасулов «Бу ҳолат ҳуқуқни муҳофаза қилувчи органлар томонидан ўрганилади. Биз олдиндан бирор гап айтолмаймиз. Аммо давлатимиз қонунчилиги бўйича ҳолат ўрганилиб, бизга хулоса берилади. Шундан сўнг бу ҳақда бирор нима дейишимиз мумкин», — деди.
Эслатиб ўтамиз, қурилишда иштирок этаётган ишчиларнинг норозилик уюштириши билан боғлиқ хатти-ҳаракати Қашқадарё вилояти прокуратураси ходимлари томонидан ўрганилмоқда.
Энергетика вазирлиги 21 октябрь куни 7:30 да бошланган ишчиларнинг норозилиги бош пудратчилар (Enter Engineering, Hyundai Engineering), шунингдек, буюртмачи (Uzbekistan GTL) офис биноларининг дераза ойналари, офис жиҳозларини синдириш, шунингдек, бошқа вақтинчалик бино ва иншоотлар (ошхона, омборлар, назорат пунктлари ва бошқалар) бузилишига олиб келганини маълум қилганди.
Мавзуга доир:
- «Ишчиларимиз узоқ вақт қурилиш майдонида қолиб кетгани учун уларда руҳий толиқиш бўлган». Uzbekistan GTL бош директори ишчилари норозилигини изоҳлади
- Uzbekistan GTL’ни қураётган компания меҳнат қонунчилиги талабларини қўпол равишда бузгани маълум қилинди
- Uzbekistan GTL заводи ишчиларининг норозилигига сабаб бўлган яна бир ҳолат очиқланди
- Энергетика вазирлиги: Uzbekistan GTL’даги вазият барқарорлашган, барча муаммо ва масалалар жойида ижобий ҳал этилди
Изоҳ (0)