Халқ депутатлари Наманган вилояти кенгаши депутати, «Истиқлол жавоҳири» масъулияти чекланган жамияти раиси Исломжон Тайрбоев 44 ёшида вафот этди. Бу ҳақда вилоят ҳокимлиги ахборот хизмати хабар берди.

Фото: Наманган вилояти ҳокимлиги

Исломжон Тайрбоев 1976 йилда Наманган шаҳрида туғилган. 1995 йили Наманган саноат технология институти ҳузуридаги тадбиркорлик ва бизнес курсини тамомлаган.

2008 йилдан ҳозирга қадар Наманган шаҳридаги «Истиқлол жавоҳири» масъулияти чекланган жамияти раиси лавозимида ишлаб келаётганди.

Исломжон Тайрбоев 2020 йил 21 октябрь куни бахтсиз ҳодиса туфайли вафот этгани айтилади. Унинг ўлимига айнан нима сабаб бўлганига ойдинлик киритилмаган.

Эслатиб ўтамиз, 19 октябрь куни Каттақўрғон тумани ҳокими Аъзамхон Баҳромов вафот этгани ҳақида хабар берилди. 7 октябрь куни Андижон вилояти Олтинкўл тумани ҳокими Назиржон Ўринбоев ва Наманган вилояти ҳокими ўринбосари Баҳромжон Нурматов узоқ давом этган хасталикдан сўнг вафот этгани маълум бўлган эди. 29 сентябрь куни Андижон вилоятининг Хонобод шаҳри ҳокими Мусахон Мамадалиев ўткир юрак қон-томир етишмовчилиги касаллигидан вафот этгани эълон қилинган эди.