Namangan viloyati hokimining o‘rinbosari 56 yoshida og‘ir xastalikdan vafot etdi

Namangan viloyati hokimining o‘rinbosari Bahromjon Nurmatov og‘ir xastalikdan so‘ng 56 yoshida vafot etdi. Bu haqda “Daryo”ga viloyat hokimligi axborot xizmati ma’lum qildi.

Bahromjon Nurmatov 1964-yilda Namangan viloyatining Namangan tumanida tug‘ilgan. 1986-yilda Toshkent politexnika instituti, 2000-yilda Prezident huzuridagi Davlat va jamiyat qurilishi akademiyasini tamomlagan.

Mehnat faoliyatini 1986-yili To‘raqo‘rg‘on tumanidagi 148-xo‘jaliklararo mexanizatsiyalashgan ko‘chma kolonnada ustalikdan boshlagandi.

1998–2009-yillarda To‘raqo‘rg‘on tumanidagi 7-mexanizatsiyalashgan ko‘chma korxona boshlig‘i, To‘raqo‘rg‘on tumanidagi 4-qishloq qurilish kombinati direktori, Namangan “Jamoa sanoat qurilish” assotsiatsiyasi boshqaruvi raisining birinchi o‘rinbosari, raisi, Namangan viloyati hokimligining yagona buyurtmachi-injiniring kompaniyasi direktori lavozimlarida ishlagan.

2009–2016-yillarda Uchqo‘rg‘on tumani hokimi bo‘lgan.

2016–2017-yillarda yana viloyat hokimligining Yagona buyurtmachi-injiniring kompaniyasi direktori vazifasini egallagan. 2017-yildan hozirga qadar Namangan viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari lavozimida ishlab kelayotgandi.

Bahromjon Nurmatov 2020-yil 7-oktabr kuni Toshkent shahridagi klinikalardan birida og‘ir xastalikdan vafot etdi. Viloyat hokimligi axborot xizmati xabarida marhumning aynan qaysi xastalikdan vafot etganiga aniqlik kiritilmagan.