Марказий банки раиси Мамаризо Нурмуротов 22 октябрь куни ўтказилган матбуот анжуманида рубль курсининг тушиши Ўзбекистон иқтисодиётига қандай таъсир кўрсатишига изоҳ берди, деб ёзади «Gazeta.uz».
2020 йил бошидан буён рубль АҚШ долларига нисбатан 24 фоизга (61,9 дан 77,08 рублга қадар), сентябрь ойида эса қарийб 8 фоизга арзонлашди. Октябрда рубль ўзини бироз мустаҳкамлаб олган.
Мамаризо Нурмуротовнинг прогнозларига кўра, рублнинг ўзгарувчанлиги Ўзбекистон иқтисодиётига 1-2 чорак кечикиши билан таъсир қилади.
«Биринчи навбатда бу пул ўтказмаларининг камайиши доирасида таъсир кўрсатади. Тўққиз ой давомида ўтказмалар 4 фоизгагина камайган. Давлатлар кесимида қараладиган бўлса, Россиядан келаётган пул ўтказмалари 11 фоизга қисқарган. Албатта, бу ерда рубль курсининг пасайиши ўз ролини ўйнамоқда, яъни бу валюта ўтказмаларининг камайишига таъсир кўрсатди», — дейди раис.
Хусусан, 2020 йилнинг ўтган тўққиз ойи давомида трансчегаравий пул ўтказмалари 175 миллион долларга (3,9 фоиз) камайиб, 4,3 миллиард долларни ташкил этган. Йил охирига қадар ушбу кўрсаткич 5,5-5,6 миллиард долларга етиши ёки 2019 йилги кўрсаткичларга қараганда 6-8 фоизга кам бўлиши кутилмоқда.
Бундан ташқари, Марказий банк раисининг сўзларига кўра, ўзбекистонлик экспортчилар ҳам Россия валютасининг девальвациясидан зарар кўради.
«Хоҳлаймизми ёки йўқ, бизнинг маҳсулотимиз Россия бозорида рублда баҳоланади. Табиийки, бу экспортчиларимизнинг даромадига ўз таъсирини кўрсатади. Биз буни ҳозирдан ҳис қилиб, кўриб бўлдик. Биз уни экспорт ҳажмини ошириш ҳисобига компенсация қиламиз», — дейди регулятор раҳбари.
«Олтин нархининг кўтарилиши миллий валюта курсимизга тўғридан-тўғри таъсир кўрсатмайди. Тўғридан-тўғри. Нега? Чунки Марказий банк олтинни жаҳон нархида сотиб олади. Бу эса нархнинг кўтарилишидан фақат ишлаб чиқарувчи фойда кўришини билдиради», — дейди у.
Мамаризо Нурмуротовнинг қўшимча қилишича, олтин нархининг ошиши ишлаб чиқарувчилар даромади ва давлат бюджетига ижобий таъсир кўрсатади.
«Ҳисоб-китобларимизга кўра, олтин нархининг ошиши 2020 йилда иқтисодиётимиз учун қўшимча 24 миллион сўм беради. Бироқ ушбу даромадларни бевосита ишлаб чиқарувчи ва улар орқали бюджет олади. Шу нуқтаи назардан олтин нархининг ўзгаришини миллий валюта курсига таъсирини кўрмаяпмиз», — дейди МБ раиси.
Аввалроқ Ўзбекистон август ойида 31,7 тонна олтин сотгани тўғрисида хабар берилганди.
Эслатиб ўтамиз, сентябрь ойи бошларида Ўзбекистон олтин-валюта захиралари май ойидан буён биринчи бор қисқарди. Мамлакатнинг расмий захира активлари 1 сентябрь ҳолатига кўра, 34,6 миллиард долларни, халқаро захиралар — 33,8 миллиард долларни ташкил этди. Ўзбекистон ўз олтинларини фаол сотгани пандемия даврига тўғри келди. Капитал бозорини ривожлантириш агентлиги директори Отабек Назиров олтин-валюта захирасини сотиб, маблағларни мамлакат иқтисодиётини қутқаришга ва ишсизлар сони ортишининг олдини олишга йўналтириш мумкинлигини айтганди.
Изоҳ (0)