ДТМ: «Ҳарбий тавсияномага эга абитуриентлар муаммоси 3-4 кунда ҳал бўлади»

Муддатли ҳарбий хизматни ўтаб, қўмондонлик тавсияномасини олган бўлса-да, ОТМга кириш имтиҳонларида бу имтиёзлари ҳисобга олинмаган абитуриентлар 22 октябрь куни яна Давлат тест маркази олдига йиғилди, деб хабар беради «Kun.uz».

Маълумотларга кўра, абитуриентлар ушбу масалага Вазирлар Маҳкамаси эътибор қаратишини талаб қилмоқда. Турли вилоятлардан Тошкентга келган фуқаролар билан бу гал Ёшлар ижод саройи анжуманлар залида учрашув ташкил қилинган.

Учрашувда масъуллардан Давлат тест маркази директори ўринбосари Сардор Ражабов, Давлат тест маркази директори бошқарма бошлиғи Диёрбек Қўчқоров, Давлат қабул комиссияси масъул котиби Шоҳрух Далиев ва бошқалар иштирок этди.

Муаммо шундаки, 1800 абитуриентнинг ҳарбий тавсиянома имтиёзи ОТМларга кириш имтиҳони учун тасдиқланмай қолган ва улар умумий квотадан ташқари 5 фоизлик квотага киритилмаган.

Норозилик билдираётган абитуриентларнинг аксари ўзи ҳужжат топширган ОТМларнинг «ҳарбийлар учун ўтиш балли»дан юқорироқ балл тўплагани, шунга қарамай талабаликка қабул қилинмаганини айтмоқда.

Улар октябрь ойининг дастлабки ҳафтасида ҳам ДТМ биноси олдида тўпланишганди. Аммо ўшанда айтилган муддатда натижалар эълон қилинмади.

22 октябрдаги учрашувда ДТМ директори ўринбосари Сардор Ражабов мурожаатлар кўриб чиқилаётгани, 1800 дан ортиқ абитуриентнинг ҳар бирига тегишли ҳужжатни ўрганиш вақт талаб қилишини таъкидлаган.

Ражабовнинг айтишича, шу кунга қадар 600 дан ортиқ мурожаат кўриб чиқилиб, базага жойланган. Ҳамма мурожаат ўрганиб бўлингач, эълон қилиниши кутилмоқда.

Қатор мурожаатчилар шу масала сабабли ўз вилоятларидан бир неча марта пойтахтга келишга мажбур бўлишаётгани, айримлари йўлкиранинг ўзига 2 миллион сўм сарфлаганини айтишган. Улар мутасаддилардан натижаларни шу куннинг ўзида эълон қилишни сўрашмоқда.

Давлат қабул комиссияси масъул котиби Шоҳрух Далиев муаммо 24 октябрь кунигача ҳал қилиниши, ҳар бир мурожаатчи телефон орқали хабардор қилинишини маълум қилиб, абитуриентлардан шу муддатгача сабр билан кутишларини сўраган.

«Бугунги пандемия пайтида йўлкирага пул сарфлаш осонмаслигини биламан. Шунинг учун ҳар бир абитуриентга ўзимиз хабар берамиз. Шахсан ўзим бораман Давлат тест марказига», – деди Давлат комиссияси масъул котиби.

Шу куни абитуриентлар билан мулоқотда бўлган ДТМ директори Мажид Каримов ҳам масала «узоғи 3-4 кунда» ҳал бўлишини айтган.

«Агар баллингиз тортилган чизиқдан тепада бўлса, ҳаммангиз талаба бўласиз. Қабул комиссияси раисининг шахсан ўзи (Абдулла Арипов – таҳр.) қўшимча квота берилишини ва ҳарбий имтиёзи тасдиқланадиганларнинг талабаликка қабул қилинишини айтган. Бундан олдин талаба бўлганлар ҳам чизиқдан пастга тушиб кетмайди», – деди Мажид Каримов.

Эслатиб ўтамиз, 5 октябрь куни Тошкент шаҳридаги Давлат тест маркази биносига ҳарбий тавсияномаси бўла туриб, лекин имтиёз қўлланилмаган абитуриентлар тўплангани хабар қилинганди. Унда бир қанча абитуриентлар ва уларнинг ота-оналари ушбу вазият бўйича ДТМдан изоҳ талаб қилиб, бу масалани ҳал қилишни талаб қилишган. Лекин ДТМ вакили бу муаммони ҳал қилиш марказнинг ваколати доирасида эмаслигини билдириб ўтган эди. Кейинроқ ДТМ ҳарбий тавсияномалари бўлган мурожаатчилар рўйхати қайта кўриб чиқилишини билдирган.